Tugkaran Sa Kalubihan

Malipayong Adlaw Sa Kasingkasing: Labi na sa Midaog sa Kalubihan V-Day Papremyo

2010-02-14T09:39:00.001+08:00

PAHALIPAY Sa Kinagwapohan ug Kinagwapahan nga Tamsi Sa Kalubihan

KALUBIHAN VALENTINES PAPREMYO: Tamsi Sa Kalubihan

2010-02-11T11:14:00.001+08:00

Kalubihan Valentines Papremyo

.

Tamsi Sa Kalubihan

2 ang modaog, Babaye ug Lalaki, tag 2000 Pesos matag usa.

Paunsa modaog?

Criteria:

1. Tamsi (Bisdak Twitter) kun apil sa http://twitter.com/kalubihan/tamsi

2.Silingan, Apil sa Kalubihan, http://kalubihan.ning.com.

3. Binisaya iyang tweets/text messages.

4. Daghan tigsunod/followers.

5.Dunay kontribusyon sa pagpalambo sa Binisaya diha sa Twitter.

Deadline:

Ipahibalo ang Midaog sa

Pebrero 12,2010 alas 12:00 tunga-tunga sa gabii

Ang premyo ipadala sa imong address (ipahibalo lang imong address ug cellphone number)

agi sa Western Union.

Aron malingaw Apil Na! Dapita ang mga Tamsi (Bisdak Twitter) nga Higala sa pag-apil sa Kalubihan!

http://kalubihan.ning.com aron maapil sa listahan sa Tamsi Sa Kalubihan. http://twitter.com/kalubihan/tamsi

MagBinisaya ta sa Kalibotan Sa Twitter,http://twitter.com

Sundi(Follow) dayon ang http://twitter.com/kalubihan ug ipahibalo nga ikaw apil na sa Kalubihan,

Lubi

P.S. SALAMAT sa atong mga Sponsor ug sa Gapahigayon niining tigi sa Valentines Papremyo Tamsi Sa Kalubihan.

Labyog-Labyog Live sa Radyo Bisdak

2009-12-20T11:32:00.001+08:00

Labyog-Labyog Live sa Radyo Bisdak karon ,11:29 am (Pinas time) petsa 20 sa Disyembre.

Labyog-Labyog og Gitara silang Abay Rolly uban sa iyang duha ka igsoon si Ritchie Wagas (Mayor sa Compostela) ug si Lambanog.

Lubi

Malipayong Pasko sa Radyo Bisdak!

2009-12-18T22:53:00.001+08:00

Alang sa Tigdumala sa Radyo Bisdak:
http://radyobisdak.com

Bay Rolly,

Malipayong Pasko!

Dugang.
Palihog pod og labyog sa Radyo Kalubihan,
mao ning kutay :

http://radyo.mooo.com

Lubi Kalubihan
http://kalubihan.ning.com

---------

Bay Rolly,

Palihog kog labyog!
Gipasiugdahan ni sa Lunsayng Bisaya
http://groups.yahoo.com/group/bisaya

Malipayong Pasko! :-)
Lubi
p.s.
----------------

Lunsayng Bisaya Tigi Sa Pagsulat Og Sugilanon 2009

ANG Lunsayng Bisaya, usa ka onlayn nga grupo sa mga Bisaya nga nagmahal sa
pinulongan ug kulturang Bisaya, mapagarbohong mobukas sa usa ka tigi sa pagtagik
og sugilanon. Kining maong tigi maoy ikaduhang tuig sa kompetisyon.

Lagda sa Pagsalmot:

1. Ang tigi bukas sa kategoriya sa Sugilanon ug Balak;

2. Usa lamang ka salmot sa matag magsusulat ang mahimong itampo sa matag
kategoriya.

3. Ang tigi bukas sa tanang magsusulat, propesyonal kun bag-ohanon, babaye man
kun lalaki, edaran man kun batan-on. Ang mga sakop sa Lunsayng Bisaya lehitimo
usab nga makaapil ning maong tigi gawas lang sa mga sakop sa sekretaryat;

4. Ang isalmot nga Sugilanon ug Balak kinahanglan nga maghubit sa tema sa
kailhanan, kultura, ug sensibilidad nga Bisaya;

5. Ang tanang salmot sulaton sa pinulongang Binisaya kun sa bisan unsang
diyalekto nga Binisaya (sama sa Binisayang Binol-anon, Binisayang Sinurigawnon,
Binisayang Sinugboanon, ubp.);

6. Ang salmot kinahanglang orihinal ug dili hinubad gikan sa laing pinulongan,
dili sinundog gikan sa laing sinulat, ug wala pa makadaog og ganti sa bisan
diing tigi ug sa bisan diing kapunongan nga nagpasiugdag tigi. Ang salmot
kinahanglang wala pa sab mapatik sa bisan unsang mantalaan, magasin, ug sa bisan
unsang porma sa publikasyon lakip na sa internet;

7. Ang salmot dili butangan og ngalan sa tagsulat bisan takoban. Sa usa ka
linain nga sobre, isulod sa sumasalmot ang iyang pinirmahang Panghimatuod nga
ang iyang salmot kaugalingon niyang obra. Sa maong Panghimatuod, isulat usab sa
tagsulat ang iyang ngalan, adres ug numero sa telepono/selpon;

8. Ang salmot nga Sugilanon andamon sa upat ka limpiyong kopya sa 8 ½ x 11 nga
bondpaper nga tagurha ang giblang (double-spaced), makinilyado man kun
kompyuterisado. Kon kompyuterisado, ang salmot kinahanglan nga mogamit lamang sa
Arial o kaha Times New Roman nga font style (font size no. 12). Ang gitas-on sa
salmot dili mokuwang sa lima (5) ka pahina ug dili sab molapas sa kawhaan (20).

9. Ang salmot nga Balak andamon sa upat ka limpiyong kopya sa 8 ½ x 11 nga
bondpaper. Sukwahi sa Sugilanon, ang Balak mahimong single-spaced o kaha
double-spaced ba hinuon ang pagkatagik, depende sa buot ipalungtad nga estilo sa
tagsulat, basta kay dili lang kini molapas sa lima ka pahina.

10. Ang kataposang pagpanawat sa salmot kutob lang sa alas 10 sa gabii sa Enero
10, 2010. Ang mga salmot nga di madawat sa sekretaryat sa maong petsa dili
isipon nga lehitimong salmot. Ang Lunsayng Bisaya dili manginlabot sa salmot nga
nahawani sa pahatanan. Wala usay tulubagon ang Lunsayng Bisaya sa pag-uli ngadto
sa mga tag-iya sa mga salmot nga ma-disqualify o kaha mapilde. Ang mga mananaog
lamang ang pahibaloon sa Lunsayng Bisaya sa tukmang petsa sa pagtunol sa ganti.

11. Ang mananaog nga mga salmot panag-iyahon gihapon sa nanagpakadaog ug ilaha
gihapon ang katungod sa pagpapatik. Apan ang Lunsayng Bisaya may katungod usab
sa paggamit niini sa ilang kalihokan nga dili na mananghid sa tagsulat kun
mohatag bag bayad.

12. Ang desisyon sa mga hurado pagaisipong pinal na, dili malubag ni magukod.

Mga Ganti:
Unang Ganti: P5,000.00 lakip ang tropeyo ug Sertipiko sa Pagdaog
Ikaduhang Ganti: P3,000.00 lakip ang tropeyo ug Sertipiko sa Pagdaog
Ikatulong Ganti: P2,000.00 lakip ang tropeyo ug Sertipiko sa Pagdaog

Ang tanang salmot ipadala lang sa:

Lunsayng Bisaya Tigi Sa Pagsulat Og Sugilanon 2009
c/o Hector Suano
1857 Singalong Street
Malate, Manila

Gikan: http://groups.yahoo.com/group/bisaya/message/12925

Lunsayng Bisaya Tigi Sa Pagsulat Og Sugilanon 2009

2009-12-18T22:37:00.001+08:00

Lunsayng Bisaya Tigi Sa Pagsulat Og Sugilanon 2009

ANG Lunsayng Bisaya, usa ka onlayn nga grupo sa mga Bisaya nga nagmahal sa
pinulongan ug kulturang Bisaya, mapagarbohong mobukas sa usa ka tigi sa pagtagik
og sugilanon. Kining maong tigi maoy ikaduhang tuig sa kompetisyon.

Lagda sa Pagsalmot:

1. Ang tigi bukas sa kategoriya sa Sugilanon ug Balak;

2. Usa lamang ka salmot sa matag magsusulat ang mahimong itampo sa matag
kategoriya.

3. Ang tigi bukas sa tanang magsusulat, propesyonal kun bag-ohanon, babaye man
kun lalaki, edaran man kun batan-on. Ang mga sakop sa Lunsayng Bisaya lehitimo
usab nga makaapil ning maong tigi gawas lang sa mga sakop sa sekretaryat;

4. Ang isalmot nga Sugilanon ug Balak kinahanglan nga maghubit sa tema sa
kailhanan, kultura, ug sensibilidad nga Bisaya;

5. Ang tanang salmot sulaton sa pinulongang Binisaya kun sa bisan unsang
diyalekto nga Binisaya (sama sa Binisayang Binol-anon, Binisayang Sinurigawnon,
Binisayang Sinugboanon, ubp.);

6. Ang salmot kinahanglang orihinal ug dili hinubad gikan sa laing pinulongan,
dili sinundog gikan sa laing sinulat, ug wala pa makadaog og ganti sa bisan
diing tigi ug sa bisan diing kapunongan nga nagpasiugdag tigi. Ang salmot
kinahanglang wala pa sab mapatik sa bisan unsang mantalaan, magasin, ug sa bisan
unsang porma sa publikasyon lakip na sa internet;

7. Ang salmot dili butangan og ngalan sa tagsulat bisan takoban. Sa usa ka
linain nga sobre, isulod sa sumasalmot ang iyang pinirmahang Panghimatuod nga
ang iyang salmot kaugalingon niyang obra. Sa maong Panghimatuod, isulat usab sa
tagsulat ang iyang ngalan, adres ug numero sa telepono/selpon;

8. Ang salmot nga Sugilanon andamon sa upat ka limpiyong kopya sa 8 ½ x 11 nga
bondpaper nga tagurha ang giblang (double-spaced), makinilyado man kun
kompyuterisado. Kon kompyuterisado, ang salmot kinahanglan nga mogamit lamang sa
Arial o kaha Times New Roman nga font style (font size no. 12). Ang gitas-on sa
salmot dili mokuwang sa lima (5) ka pahina ug dili sab molapas sa kawhaan (20).

9. Ang salmot nga Balak andamon sa upat ka limpiyong kopya sa 8 ½ x 11 nga
bondpaper. Sukwahi sa Sugilanon, ang Balak mahimong single-spaced o kaha
double-spaced ba hinuon ang pagkatagik, depende sa buot ipalungtad nga estilo sa
tagsulat, basta kay dili lang kini molapas sa lima ka pahina.

10. Ang kataposang pagpanawat sa salmot kutob lang sa alas 10 sa gabii sa Enero
10, 2010. Ang mga salmot nga di madawat sa sekretaryat sa maong petsa dili
isipon nga lehitimong salmot. Ang Lunsayng Bisaya dili manginlabot sa salmot nga
nahawani sa pahatanan. Wala usay tulubagon ang Lunsayng Bisaya sa pag-uli ngadto
sa mga tag-iya sa mga salmot nga ma-disqualify o kaha mapilde. Ang mga mananaog
lamang ang pahibaloon sa Lunsayng Bisaya sa tukmang petsa sa pagtunol sa ganti.

11. Ang mananaog nga mga salmot panag-iyahon gihapon sa nanagpakadaog ug ilaha
gihapon ang katungod sa pagpapatik. Apan ang Lunsayng Bisaya may katungod usab
sa paggamit niini sa ilang kalihokan nga dili na mananghid sa tagsulat kun
mohatag bag bayad.

12. Ang desisyon sa mga hurado pagaisipong pinal na, dili malubag ni magukod.

Mga Ganti:
Unang Ganti: P5,000.00 lakip ang tropeyo ug Sertipiko sa Pagdaog
Ikaduhang Ganti: P3,000.00 lakip ang tropeyo ug Sertipiko sa Pagdaog
Ikatulong Ganti: P2,000.00 lakip ang tropeyo ug Sertipiko sa Pagdaog

Ang tanang salmot ipadala lang sa:

Lunsayng Bisaya Tigi Sa Pagsulat Og Sugilanon 2009
c/o Hector Suano
1857 Singalong Street
Malate, Manila

Gikan: http://groups.yahoo.com/group/bisaya/message/12925

[Zoho Writer] lunsayngbinisaya has emailed Baybayon: Ikaduhang Semana sa Oktubre 2009 to you

2009-12-06T00:30:00.003+08:00

Baybayon: Ikaduhang Semana sa Oktubre 2009

17 ka balak sa Baybayon ang midagsa.

Guniti imong kasingkasing, taboni, samtang gabasa ka sa 'Piniko Nga Mga Dughan' ni Candice Salazar. Hait ang pulong sa magbabalak, dulot sa bukog kon makasamad. Basaha na lang gyod ug ikaw na lay mosaysay sa imong pagbati sa unang pagbasa, ug sa imong pagsubli sa pagpamati niini.

Mahinuklogon ang 'Hakog sa Kinabuhi' ni Ric S. Bastasa, kon dili gani, mahagiton. Apan makahinuklog gyod ka, kay sa imong pagbasa, ikaw makapangutana kon ikaw hakog ba?

Samtang sa 'Disgrasya?' nga nagtangag og pangutana, wa kay mahinuklogan, way mapangutana, apan mahingangha ka sa imong nasaksihan, usa ka hitabo nga maayong pagkahulagway agi sa mga pulong.

Lubi

piniko nga mga dughan

mingaab ang hait nga unos
nga mipahit sa kabukogan.
pait milugdang
pagtak-op sa tambo-anan

subo ang pag-inusara
apan may pagmaya
sa pagsugakod

ang kahilom
sa pinaril nga galamhan
nagmaskara ug kalinaw

ang tiniklop nga gugma
mao ang kamatayon...

--Candice Salazar

hakog sa kinabuhi

ang sa imoha
sinukod sa mga nanglabay
nga katuigan

ang sa alibangbang dili
gani kadyot lamang

apan nganong ang imo
imo pa man gayong ingnon
nga kulang?

--Ric S. Bastasa

disgrasya?

mapasutoy ang usa ka motorsiklo
mitagbo sa laing motorsiklo nga ang
gamaneho haskang huboga gayod kaayo

naghinangop sila sa gakos sa tawong
nagdala og hait kaayong sanggot
daghang nakakita og wala makatingog
nagpasad ang mga utok sa uga kaayo nga karsada

--Ric S. Bastasa

[Zoho Writer] lunsayngbinisaya has emailed Baybayon: Ikaduhang Semana sa Oktubre 2009 to you

2009-12-06T00:30:00.001+08:00

Baybayon: Ikaduhang Semana sa Oktubre 2009

17 ka balak sa Baybayon ang midagsa.

Mahinuklogon ang 'Hakog sa Kinabuhi' ni Ric S. Bastasa, kon dili gani, mahagiton. Apan makahinuklog gyod ka, kay sa imong pagbasa, ikaw makapangutana kon ikaw hakog ba?

Samtang sa 'Disgrasya?' nga nagtangag og pangutana, wa kay mahinuklogan, way mapangutana, apan mahingangha ka sa imong nasaksihan, usa ka hitabo nga maayong pagkahulagway agi sa mga pulong.

Lubi

piniko nga mga dughan

mingaab ang hait nga unos
nga mipahit sa kabukogan.
pait milugdang
pagtak-op sa tambo-anan

subo ang pag-inusara
apan may pagmaya
sa pagsugakod

ang kahilom
sa pinaril nga galamhan
nagmaskara ug kalinaw

ang tiniklop nga gugma
mao ang kamatayon...

--Candice Salazar

hakog sa kinabuhi

ang sa imoha
sinukod sa mga nanglabay
nga katuigan

ang sa alibangbang dili
gani kadyot lamang

apan nganong ang imo
imo pa man gayong ingnon
nga kulang?

--Ric S. Bastasa

disgrasya?

mapasutoy ang usa ka motorsiklo
mitagbo sa laing motorsiklo nga ang
gamaneho haskang huboga gayod kaayo

naghinangop sila sa gakos sa tawong
nagdala og hait kaayong sanggot
daghang nakakita og wala makatingog
nagpasad ang mga utok sa uga kaayo nga karsada

--Ric S. Bastasa

Baybayon: Unang Semana sa Oktubre 2009

2009-10-07T10:22:00.000+08:00

Baybayon: Unang Semana sa Oktubre 2009

33 ka balak ang midagsa sa Baybayon

Ang Pana-ad sa Gugma ni Eric E. dunay giputos nga lamian, giputos sa mga pulong ang balaan, ang gugmang tunhay. Gikan gyod tingali ni sa kasinatian niya, kon dili man, gikan sa iyang kasingkasing kining balaka. Aron pagtagamtam sa iyang balak, hinayhinayan lang og basa, hinayhinayon og abli ang giputos nga mga pulong balaknon ug moladlad ang pino nga sensibilidad sa balak, sa tinipigan nga kasinatian nga tiunay.

Puhon ni Ric S. Bastasa,
'kini ang gustong makita sa kaugalingon', matod pa...kining linyaha nagdala sa magbabasa og ekspektasyon o kaha nagdala og bag-ong daymensyon sa balak. Samtang naghulagway kunohay sa gustong makita nga bungoton o baga nga nawong, ug uban pa, nadayag hinoon ang dili na buot handomon sa magbabalak,
'ayaw na ako tagai pa
anang bulak sa
rosa
o anang azul sa
mga panganod
o anang lunhaw sa
mga bermuda'

nga mao na hinoon nga nadayag sa balak nga maoy aktwal karon nga gusto sa magbabalak.

Ang dili gusto makita, maoy nakita hinoon karon sa magbabasa. Mao ning dula sa gusto ug dili gusto, sa puhon ug sa karon, ang panag-atbang sa duha ka lahi, nga maoy naghatag pod og kinabuhi sa balak. Dula sa kinabuhi ug kamatayon, maoy kinatibuk-an nga tema dinhi, sa ingon, gihuman ang balak sa nindot nga imahen,

'kanang paghulog sa dahon
sa tiilan sa akong
pagkahanaw'

ug dinhi natapos ang balak, dinhi nahiusa ang magbabalak ug ang 'pagkahulog sa dahon'.Samtang, nagpadayon ang daynamik nga gimok sa 'contrast' sa 'pagkahanaw niya' ug pagkakita sa dahon nga nahulog diha sa tiilan diin ang wala diha, ug ang naa diha nahiusa sa usa ka linya. Nagpabilin pod og pangutana, duna bay tiilan ang pagkahanaw? Hinoon kasagaran ang nahanaw, tungod kay milakaw o mipanaw. Konektado gihapon ang tiil ug ang paglakaw. Hinoon, morag ang mahulagway sa maong linya, mao ang tiilan sa lubnganan, usa ka opsyon nga imahen nga mahanduraw sa magbabasa. Pero mas nindot gyod ang 'tiilan sa pagkahanaw' kay pamilyar apan talagsaon nga handurawan.

Sibo ni Ric S. Bastasa,
'awat-awat sa balak ni margret atwood', matod pa niya, ug tuod man sibo gyod kaayo pagkagaray.

Lubi

Ang Pana-ad sa Gugma
By Genamos_US of Washington, DC, USA

Imong gihikap ang akong kamot
Ug atong duha ka mga mata nanag-abot nga wala tuyo-a
Imo kung gitutokan ug akong kasingkasing.Nag-alindasay sa pagpitik nga walay pu-as sa kakusog

Akong gisubay ang matag badlis og kurbada sa yano mong panagway
nga gikulit ni Bathala.Gianod mo ako, sa pagpaduol dinha kanimo kay gilamat sa gilak sa imong panan-aw.

Akong nabasa ang mga pagbati natong duha kay sa gugma kita gi-amoma
Ug sa walay pananghid sa kalit ikaw akong gibugkusan ning akong mga bukton
Aron sa paghatag og katahuran sa init kung mga gakos.
Ug ikaw nagpauraray susama sa mga balod gawasnon nga gitapya sa mga hangin padulong sa babayon
Ug sa pagdunggo sa imong nawong dinhi sa akong dughan.
Nitulo ang mga luha sa kalipay nga nisubay sa imong mga aping.

Imong nadungog ang mga awit sa gugma nga padayon nagmaya sa lawak ning akong kasingkasing
Akong gihagawhaw kanino hadu-ol sa imong dung-gan ang mga pulong sa gugma nga dugayng nakong gitapigan sa akong pag-inusara

Akong gipanumpa sa langit og gisa-ad kanimo nga ikaw ra ang akong higugma-on hangtod sa akong kamatayon.
Ani-a ako,nga andam mopangga kanimo og alagaran ta ning gugmang walay utlanan.
Akong gipangdoy ning kinabuhi nga ikaw akong ika-uban hangtod sa atong katigulangon.

--Eric E

Puhon

puhon mao kini
ang akong gustong makita sa akong kaugalingon

baga ang balbas
bungot nga wala nay pul-ong
buhok nga kalkag
kilay nga labong
walay padulngan
lalom ang
akong hunahuna
mas lalom pa
gani sa ikapitong lawod
sa dagat
baga ang akong kunot
sa agtang
mas baga pa sa akong
nawong karon

gusto nako nga ako
puti og itom na lamang
dili na ko ganahan
og kahayag
ayaw na ako tagai pa
anang bulak sa
rosa
o anang azul sa
mga panganod
o anang lunhaw sa
mga bermuda

anaron ko na ang akong
kaugalingon sa
bulok sa kagabhion
sa paghupas unya
sa kahaponon

diha sa kahilom unya
sa akong lubnganan
sa pagtakyop unya
sa kahayag
kanang wala na akoy
madungog nga kisaw
bisan pag
tugaw sa paglupad
sa alibangbang
o sa mga tunob
sa mga ulod

kanang paghulog sa dahon
sa tiilan sa akong
pagkahanaw

Ric S. Bastasa

Sibo

sibo
tang duha
morag
tanod sa
mata sa
dagom

morag taga
sa tilaok
sa isda

(awat-awat sa balak ni margret atwood
"You Fit into Me")

--Ric S. Bastasa

Baybayon: Kataposang Semana sa Setyembre 2009

2009-09-30T23:52:00.002+08:00

14 ka balak ang midagsa sa Baybayon

Adunay naghisgot kabahin sa kawayan sa ilang tugkaran, aduna poy nagbutyag sa iyang kasinatian daplin sa Baybayon.

Tagamtama ang diretso nga pagpasinati ni Ric S. Bastasa sa iyang kasinatian diha sa iyang balak nga Lawiswis Kawayan. Ang Kawayangihulagway usab ni Eric E, gipintal kini sa iyang mga balaknong pulong.Masinati pod nimo ang tanaman nga nalandongan sa mga dahon ibabaw sa iyang gilingkoran. Mohanduraw sa pinintal nga balak ang magbabasa, dayon iyang makita ang gikahimutangan sa magbabalak ug sa tanaman.

talimad-an
ni Ric S. Bastasa, usa ka balak nga masinati, kun nag-aghat sa pagsinati sa giulohan niini nga tema kun kasinatian.

Lawiswis Kawayan

naglingkod ko ganihang buntag
sa among bangko
didto sa veranda
og sa wala damha
nakita ko ang kawayan sa kilid
sa among balay
nga mitaas na og milabong

nindot ang akong gibati
nga mora bag ang akong kasingkasing
kalit nga nakakat-on unsaon
pagsayaw diha sa hangin

ang akong mga mata nangalipay
nga mora bag adunay miabot
gikan sa halayong dapit
nga dugay ko na nga wala makita
og karon ania
mihalok sa akong aping

--Ric S. Bastasa

Ang Kawayan

Sa akong paglingkod-lingkod sa ti-ilan ning dakong kawayan aron pagpahulay nonot sa pagsubang sa haring adlaw
Akong nakita ang bidlisiw sa adlaw nihalok sa lunhawng mga dahon aron sa paghatag og katahuran ning sayong kabuntagon
Ang hoyohoy sa hangin nag-iyahay sa paggakos sa matag dahon aron isayaw ang iyang katahom.

Kung imo kining sud-ongon ang mga dahon sa kawayan murag mga lusok sa mga luha nga nangumbitay sa iyang puno-an.
Ug samtang kining akong huna-huna nagduhiraw og walay tumong kung asa idunggo kining akong pangisip nga gidasig sa katahom sa palibot.

Pero sa tanto nakong liraw napadpad kining akong mga mata sa mga tanaman nga nag-alirong duol sa ti-ilan sa puno-an sa kawayan, nga nagyogpos kay wala makatilaw sa halok sa kainit sa adlaw kay gi-agbayan sa mga anino sa mabagang dahon sa ibabaw ning akong nahimotangan.

--Eric E

talimad-an

og nahimong samin ang imong
mga pulong
naaninaw ang ikaw sa mga
silaba
nga misilab sa akong galamhan
sama sa
akong nakita nga hulagway
atubangan sa
kahayag sa mga sagbot og
kahoy
nga atong gidauban
pagkahuman sa pagdap-ig
sa atong mga pus-on
og pagduladula sa atong mga dila

niadtong gabhiona ambot
og natalimad-an mo ba
nga wala ang bulan og ang
mga bitoon
mora bag nahisama sila sa
mga anino
nga nagpahipi na lamang
sa baga kaayong mga
dahon sa punoan sa
mga kahoy
didto sa daplin sa
puti kaayong mga balas
sa baybayon

--Ric S. Bastasa

Baybayon: Ikatulong Semana sa Setyembre 2009

2009-09-29T15:32:00.002+08:00

Baybayon: Ikatulong Semana sa Setyembre 2009

16 ka balak ang midagsa sa Baybayon, pipila ka mga balak ni Ric S. Bastasa naggaray sa inato nga kasinatian sa pagkapuol, panag-away, ug pangindahay .

ang pagkapuol
na tan-awa
miabot ra gayod ang
imong pagkapuol
sa pagsunod-sunod
sa akong mga
tunob
kay seguro abi
nimo og aduna kay
makita sa unahan
kay abi nimo
og aduna ako'y
padulngan
og hantongan

dugay ko na ikaw
nga giingnan
nga wala ako'y
padulngan
og wala usab ako'y
gisundan og wala
usab ako labaw sa
tanan
nga sumdanan

buta ako nga
naghimo sa akong dalan
nagdampas sa
baga og daghan
kaayong kasagbotan
naghawan
nanglimpyo

bungol ako
og wala ako'y nadungog
sa mga tanghaga nga
nakigsulti kanako

amang ako
sa akong gibati
og bisan pa man seguro
og duna'y mga pulong
nga namugna sa
baba sa akong
kasingkasing
dili og dili ko gayod
kini isaysay kanimo

miabot na ang
pagkapuol
og busa ania ako
nagpasalamat
pag-ayo kanimo

--Ric S. Bastasa

una hirundo non facit ver

ang usa ka
maya wala nagtimailhan
sa pag-abot
na sa ting-ani

dugay nang nagpaabot
ang gugma
sa pipila ka tuig
namintana ang imong
kasingkasing
sa abog kaayo nga
kalsada

og miabot ang gugma
og nalipay ka
abi nimo og ikaw ang
iyang tuyo.

dili baya.

--Ric S. Bastasa

graviora manent
dili na kinahanglan
ang paglalis
kay sayod ka
nga ang mas bug-at
mao gayod
ang imong ipabilin

ako ang mobiya
diha sa usa ka gaan kaayong pagbati

--Ric S. Bastasa

Baybayon: Ikaduhang Semana sa Setyembre 2009

2009-09-29T14:58:00.003+08:00

Baybayon: Ikaduhang Semana sa Setyembre 2009
23 ka balak karon sa Baybayon

Ang Galamhan ni Candice Salazar matahom pagkagaray. Kon imong makita ang iyang dughan, ang galamhan sa iyang balaknong kalag, nindot gyod bisan gitabonan sa ulan sa mga balaknong pulong.

dag-om ni Ric S. Bastasa daw bug-at nga ulan, nahulog sa tig-a nga pagbati. Haom ang mga pulong nga nangahulog niining balaka, midagayday daw busay.

Mantra ni Ric S. Bastasa, way laing himoon, balik-balika lang og basa.

Ang Galamhan
Haw-ang ang hangin.
Way timik ang lawa
diin nahulog ang anino
ug ang balilihan mikunhod
sa dihang hingkod
na ang kangitngit

Ang kunuhay'ng makinaadmanon
misalikway sa
kalawom sa galamhan
nga kung tuki-on
may tubod nga molapas
pa sa kamatayon

Sa dihang ang
kahayag sa bulan
inanay'ng napalong
ug misambog na sa banagbanag,
miusbaw ang mga
nahi-agom nga nahikalimot
na sa ilang damgo

Mabaw ang akong pagkatulog.
Ang akong amahan
nabuhi apan gilansang
pag-usab sa krus

Mga luha'ng mituhop
sa lumalabay nga
kagabhion

way sangkoanan...

--Candice Salazar

dag-om

dag-om
and sud sa imong
hunahuna

og sa kabug-at
sa imong
gibati

nahulog ang mga
luha

ang tanan
nahug sa
tig-a ko nga pagbati

gipangita mo
ang akong kasingkasing

dugay ra kining
nawa

--Ric S. Bastasa

mantra

Dios nga gamhanan
Dios nga manggiloy-on
Dios nga matood
Dios nga akong agalon
Dios nga dalaygon
Dios nga dili limtanon
Dios nga manggihatagon
Dios nga Amahan
Dios nga Anak
Dios nga Ispiritu Santo
Dios nga Timaan
Dios nga balaan

Akong Dios
nga Nagmugna kanako
Ikaw na ang bahala
kon asa ako isangko

--Ric S. Bastasa

Baybayon: Unang Semana sa Setyembre 2009

2009-09-29T14:30:00.002+08:00

Baybayon: Unang Semana sa Setyembre 2009

20 ka balak miabot sa Baybayon

Yano nga pagkahulagway, daw gihipos lang nga habol, kining hilisgotan sa ugma, karon, kagahapon, gihipos dinhi sa balak nga SAKTO KA ni Ric S. Bastasa.

Wa poy lalis ning balaka, samtang ako nagpaabot, ni Ric S. Bastasa, nga nagapos sa kaugalingong desisyon sa pagpaulipon bisan tuod abli na ang pultahan sa kagawasan. Simple lang nga pagkahulagway niining tulukibon nga tema sa atong kagawasan.

Sa kitang duha ni Ric S. Bastasa nagduyog ang duha sa ilang gibati ug gisaw-an. Kon unsay ilang gigunitan ug gibuy-an, sila la pod ang nasayod. Sila ug ang ilang handurawan.

SAKTO KA

ang ugma

umaabot pa

busa wala pa

ang kanhiay

nga kagahapon

nahuman na

og busa wala

na usab

ang karon

mao ang ania sa atong mga kamot

nanghaploy

ania sa atong ilok

nga sarang kagilok

ania sa atong utok

nagpaitok-itok

busa karon

ako nagpaaron-aron

sa karon ako

nagpatiurok

morag manok akong

mitugtugaok

sa tumang kahubog

sa akong kalipay

isunod na nako ang ugma

og ang kagahapon

sa habol ako na nga pil-on

og hipuson sa dayon

--Ric S. Bastasa

samtang ako nagpaabot

dili baya lalim ang magpaabot

sa wala,

nagsakit ang akong mga tiil

og tindog

og ang akong kamot naglaylay

anang pagkalaay

matag oras sa matag gabii

gipaabot ko ikaw

giampo ko nga unta

ikaw ilubong ko na sa kalimot

nga unta ako sama sa usa ka tamsi

nga ania nasulod sa hawla sa usa ka gugma

makalupad na unta sa kahanginan

sa akong kagawasan

apan naunsa ba

nga bisag abri na ang maong hawla

ania man lang ako gihapon

nagpapriso sa imong mga bukton....

--Ric S. Bastasa

kitang duha

itom nga langgam ang kagabhion

og sa iyang mga pako

mibatog kini tupad kanato

og kita nalooy kaniya nga gutom og uhaw

og ato kining gilawgan

sa kaputli sa atong gugma

kitang duha diha sa atong mga gakos

halok og sa atong mga kamot

gipalupad na usab nato ang kagabhion

paingon sa sunod nga isla sa atong mga handurawan.

--Ric S. Bastasa

Baybayon: Kataposang Semana sa Agosto 2009

2009-09-29T13:50:00.003+08:00

Baybayon: Kataposang Semana sa Agosto 2009

11 ka balak ang midagsa sa Baybayon ug usa na niini mao

Ang Bato ni Ric S. Bastasa
diin gihulagway ang paghumok sa batong kasingkasing tungod og alang sa gihigugma, nangaliyupo sa panganod nga modalit og ulan, bisan yamog lamang. Nindot ang gihulagway. Tataw kun tin-aw. Tiaw mo na, ang bato nahimoan og pagbati nga kasingkasing lang unta ang mobati.

sa pagkahanaw sa kataposang alibangbang ni Ric, mabatyagan pod ang kamingaw sa nawala o nahanaw.

ang gawas sa akong kalibotan ni Ric, nahuman sa panghupaw gikan sa ngiob nga dughan kun huot nga pangisip nga naipit sa kahayag ug kangitngit, sa kalami ug kapait.

Ang Bato

kaniadto
ang bato walay labot
sa iyang palibot

hilom lang siya
nga nagpatong
sa lapok
sa kilid sa sapa

ang panganod
nga maanyag
naglagot kaniya

ang iyang katahom
wala maambat
sa bato nga
wala na maghandom
og pahiyom
bisan pa sa
balod sa tubig
o sa katawa sa
ulan

apan karong adlawa
gitulon sa bato ang iyang garbo
misangpit sa ngalan sa
panganod
nangayo og ulan

ang iyang higala mga
lumot hapit na nga mamatay
sa kauga sa iyang
lawas
sa pagpangliki
sa iyang palibot

bisan og supak
sa iyang pagkabato og
kasingkasing

miampo ang bato
nagpakilimos bisan na
lang og
usa ka yamog sa dahon
bisan lamang og
usa lamang ka tulo
sa ulan
sa kaadlawon

mabuhi lang ang iyang
gihigugma

--Ric S. Bastasa

sa pagkahanaw sa kataposang
alibangbang

mingawon kita sa hangin
nga gikan sa iyang puti nga pako

og sa matag dahon nga mahulog
sa sanga sa kahoy

atong mabati
ang iyang pagkawala

--Ric S. Bastasa

ang gawas sa akong kalibotan

naglakaw ko gabii
sa fuente
lapos sa jones

gusto ko nga
malingaw
apan ngiob
kaayo ang
dalan bisan
pa sa kahayag

wala ko ambata
ang babayeng
mitutok kanako

misud ko sa
shakey's
nag-order og
greek salad
parisan sa
chocolate sundae
og mojos

milingkod ko sa
daplin og
adunay bata nga
niwang kaayo og
gakiang
hugaw kaayong
tan-awon og
mibukhad sa
iyang palad
nangayo

gibira kini sa
gwardya palayo
sa samin nga
dingding

giuna nako
og kaon ang sundae
og wala na ako
mag-ambat sa
lakaw sa kinabuhi

pagkatam-is
sa chocolate ice cream
pagkalami sa
red cherry nga
akong gidula-dulaan
sa akong dila

ahh, Dios na ang
bahala sa tanan......

--Ric S. Bastasa

Baybayon: Ikatulong Semana sa Agosto 2009

2009-08-25T11:04:00.001+08:00

Baybayon: Ikatulong Semana sa Agosto 2009

20 ka balak ang midagsa sa Baybayon

Ipaila nato karon dire ang mga balak ni Ric S. Bastasa

Mga tipik sa kinabuhi kining mga balak, ug kay mao man, mao nga lami basahon kun kaonon sama sa ginangang nga saging. Ang mga butang nga dili na nato pangayoon makabukad og kasingkasing, kay lapad ang kapunawpunawan nga ginasud-ong niining balaka.

Ug kining balak nga kita na lang duha dinhi naggaray pod sa pagbati sa magbabalak kay sila na lang duha ang nahibilin, suod ni nga pagbati, suod nga pagpadayag. Morag makaguol, apan sa laing bahin, nindot pod kay suod ang duha nga nagsalo sa maong kalipay sa panag-uban.

alang sa ulog-ulogan, kining balaka, basahon gyod aron masuta nimo, kon ikaw naigo pod niini. Klaro kaayo ni pagkagaray,way lipod-lipod, igo gyod kun igo.

Kalingawi ninyog basa.

Lubi

mga butang nga dili na nato pangayoon

mga balod sa dagat
aduna silay mga tinagoan nga awit
ang daplin sa baybayon
kanunay nga gihagkan
lapad ang dughan sa dagat
sama sa imong kasingkasing

manggihatagon
mapailobon
mabulukon
og sa kanunay naghatag kanako
og kalipay

mga panganod naglantaw
sa iyang walay sukod
nga kaanyag

og kitang duha
wala na mangayo sa bisan unsa pa
hingpit na ang tanan
kitang duha
sa tiunay nga gugma

--Ric S. Bastasa

kita na lang duha dinhi

namahawa na kaha sila wala na igdungog kon asa na dili ba kaniadto mora silag mga sayaw-sayaw sa punoan sa mangga? ang uban nagpadungog dungog nga magsalag ang uban misaad nga moawit sa matag adlaw aron ang kasubo nato dinhi unta mahupay ang uban nagpakita sa ilang mga pahiyom wala koy nakita nga nangyam-id niadtong pagsugod apan pagkagamhanan gayod sa kalimot og ang uban nga masaaron gitulon sa dakong baba sa kaligotgot ang uban nagpadaog sa mga bangkil sa kasapot og sa gamay lamang nga haguros sa hangin nanglupad sila sama sa mga langgam nga hadlok sa ulan sa linti sa dalogdog kita na lang duha dinhi gusto unta nakong makita nila ang atong gisaloan nga kalipay kalipay nga dili matukib sama sa pagtampisaw sa mga pato diha sa tubig

--Ric S. Bastasa

alang sa ulog-ulogan

ang imong kasingkasing
lapad
ingon sila og ikaw nalipay
nga sila
midayeg og nanabi nga ang imong kasingkasing haskang
lapara

nagsige kang panghatag
pagkabantogan
nga pilantropo

morag pungot ka sa kwarta nga igo lang
modap-ig sa imong palad og dayon nimog labay niini
sa bisan asa na lang

hangtod nga usa ka adlaw niana
wa na ju'y nabilin bisag kulilo sa imong bulsa

didto nimo namatyagan nga
kon wala na gani yamo
wala na jud
bisan og usa ka dako nga
makuot sa imong
bulsang haskang laloma man gyod unta

karon, naunsa ka naman?
morag lata nga gisipa sipa sa daplin sa kalsada.

kay ang imong kasingkasing man god kuno
haskang lapara
apan ang imong utok
haskang nipisa....

--Ric S. Bastasa

Baybayon: Ikaduhang Semana sa Agosto 2009

2009-08-18T20:37:00.003+08:00

Baybayon: Ikaduhang Semana sa Agosto 2009

13 ka mga balak ang midagsa sa Baybayon

Pananglitan ang Sakayang Papel ni Cindy Velasquez nga miabot sa baybayon nga daw gipalid lang sa hangin, unya namidpidpid lag iya sa lapyahan. Morag ayaay ang dagat, apan mora pod og dunay mga balod nga mihatod sa sakayan. Malinawon. Hapsay. Dunay mga hulagway nga mamidpid pod sa panimuot sa magbabasa, labi na ang pagkaayahay sa way sangit nga pagbasa niini.

Kon basahon pod nimo ang iyang balak nga Makighagwa sa langit mora pod og bation dakong ang kamingaw kun kahidlaw. Samtang gahangad sa langit, sa mga bitoon, ug sa unsa pang hinungdan, daw ikaw nanamin na man hinoon ug imong matataw ang kamingaw diha sa imong dughan.

Kinsay magdahom nga ang gilubong niining gibalak ni Ric S. Bastasa, mao diay ang gugma ko kanimo (mao pod ang titulo sa balak). Ug kinsay magdahom nga kini dili pa diay patay, inaybuhi ug milabong pa. Bisan gikalimtan na sa naglubong sa iyang gugma, anaa pa gyod diay, gapadayon. Ang nindot ani, mao ang wa damha nga anaa pa. Diay!

Kalingawi ninyo'g basa. Ug kon duna moy ipadala nga balak, dire lang ipadala: lunsayngbinisaya@gmail.com

Lubi

Sakayang Papel

Gituhil ang anino sa sakayang papel inig

salig niini sa agay ug pagtukaw sa tubig.

Nitapot sa papel ang hangin, namidpid

kini, lakip na ang gibug-aton sa panid.

Kini naunlod sa galiyok-liyok nga kabugnaw

diin ang mga letra nagkisikisi sa pagpanaw.

Ug nibukhad kini sa dila sa dagat

samtang gihapyod sa tumang kaparat.

--Cindy Velasquez

Makighagwa sa langit

Usa ka eskultor ang kangitngit

nga makighagwa sa langit.

Apan ang iyang mga kamot, mokudlit

sa gilay-on sa mga bituon

ug karong gabii gatan-aw ko nila,

ug diha pod nako mahipalgan

ang tibuok nakong kamingaw.

--Cindy Velasquez

ang gugma ko kanimo

duna kay gilubong

gusto nakong hinumduman

apan ikaw

dili na ganahan

nindot kadtong imong gilubong

ilalom sa yuta

imong gitago

apan kini mitubo

mangutana ka kon unsay ngalan?

kay imo man gyod nga sa dayon

gikalimtan

sa imong kabangis

ako nalooy

kadtong imong gilubong

gugma ko kadto nga karon

sa gihapon

milabong.

--Ric S. Bastasa

Baybayon: Unang Semana sa Agosto 2009

2009-08-11T12:49:00.004+08:00

Baybayon: Unang Semana sa Agosto 2009

27 ka balak ang midagsa sa Baybayon

Ipaila-ila karon dinhi ang mga balak ni Ric S. Bastasa

Kitang Duha Diha sa Pag-ampo morag mananoy kaayo nga sulog sa sapa nga paingon sa bukana sa Baybayon.

Bulahan ang Magpaubos, bitaw, ug ang gadaogdaog sa gapaubos maoy gibantang niining balaka, ug mao poy bitoon nga mahulog sa langit. Naapil ba ka niining buhata?

Unsa Ba ang Kalipay sa Pagkakontento? Nindot ni basahon sa hilom nga takna, sa hilom nga dapit, ug diha sa kahilom sa imong kasingkasing.

Ipadala lang inyong dsulat (email) kon gusto pod mopaambit og mga balak ngadto sa Baybayon.

Lubi

kitang duha diha sa pag-ampo

gipiyong ko ang akong mata
samtang ako
miampo diha kanimo

abi nako og lig-on ako
apan sa dihang mitupad ka na kanako
og gisimhot mo ang akong dughan
og gihagkan mo ang akong
aping og ngabil

nahumok ako
nahuyang sa imong katahom
sa imong kahumot
sa kaanindot sa imong kalag
sa kalami sa imong lawas

gipiyong ko na lang ang akong mga mata
sa dihang
ako usab sa kataposan

giampoan mo

og sa dihang giablihan mo na ang ganghaan sa langit
misulod ako og miawit

--Ric S. Bastasa

bulahan ang magpaubos

kadtong imong gikasab-an
nga wala motingog
kadtong imong giinsulto
nga wala mobalos
kadtong imong gisipa
nga natikay-ang og
wala kabangon
kadtong imong giyatakan
og nagpatara lamang

bulahan siya
kay iya na ang imong kalipay

bulahan ang magpaubos
kay iyang nakita
ang mga bato nga bulawan
nga imo lang gilud-an

pagkabulahan gayod sa
nagpaubos
kay siya lang ang hatagan
og luna diha
sa langit

og ikaw nga mapahitas-on
mahulog sama sa usa ka bitoon

--Ric S. Bastasa

unsa ba ang kalipay sa pagkakontento?

babaye nga

nga migakos sa iyang

anak nga lalaki

nga nahinanok

sa kalinaw sa

iyang dughan

dinuyogan

sa awit sa

kahilom

--Ric S. Bastasa

Baybayon: Kataposang Semana sa Hulyo 2009

2009-08-02T11:50:00.004+08:00

Baybayon: Kataposang Semana sa Hulyo 2009

42 ka balak ang midagsa sa Baybayon

Saw-an nato ang mga balak nga gidalit ni Ric S. Bastasa

Ayaw Kabalaka Inday , kini usa ka balak sa pagmaymay, sayon basahon, sayon sabton ug kon tuhuan makapagaan sa balatian. Motuo ba ka nga matinuod?

Giayag, dayag pod ang pagpangga diha pagpahimangno kun paghandom.

Ang Tanduay Mas Lami, mubo lang pero mahinumdoman, ug dili lang ang pulong apan ang kasinatian gyod nga lami-lami.

ayaw kabalaka inday

ang panahon usab

mahinog

sama sa usa ka nangka

ang iyang kahumot

mangalimyon

sama sa pag-abot na

sa mga alang lang gayod kanimo

ang mga linya sa imong ugat

maghimo og mga mapa

sa imong palad

ang mga pangutana

magsalimuang og sila na mismo

ang maghatag og

mga tubag sa imong mga kalibog

sama sa usa ka kasayon kaniadto

sa pagpangligid sa mga lugas sa humay

paingon sa imong mga kamalig

kon ikaw wala masayod sa imong

kapaingnan

ang mga agianan ang moduol kanimo

og kon ikaw wala makatultol

sa imong kapuy-an

ang mga hagdan

ang mag-ang-ang sa

imong kasak-an

ang mga pultahan mangabre

og ang katre maglatag sa habol

og mga ugnan alang kanimo

tungod kay kon imo kini

imo gayod kini

ang swerte na mismo ang

manuktok sa imong

pultahan og bisan gani

og imong balibaran

mosaka kini sa imong balay

molingkod

magkuha sa tinidor og kutsara

og mao na gayod

ang mohungit sa imong

pagkaon og ilimnon

--Ric S. Bastasa

giayag

giayag ka

aron tinoon kon pila ang

pino diha kanimo

gilain ang imong mga

tipasi

og mga bato

nga makabuak sa imong

mga ngipon

giuyog ka

dili aron mahulog ang tanan

nimong mga bunga

kon dili

aron magaan ang imong

mga sanga

napandol ka

kay nakalimot ka na

paghandom

niadtong ikaw naglakaw

nga nagluhod

paingon Kaniya

--Ric S. Bastasa

ang tanduay mas lami
kon dunay coke
daghang ice cubes
dayon imo kong ipisan
sa akong baso

unya ang imong dughan
masabod sa akong
ngabil

--Ric S. Bastasa

Baybayon: Ikatulong Semana sa Hulyo 2009

2009-07-24T07:41:00.003+08:00

Baybayon: Ikatulong Semana sa Hulyo 2009

53 ka mga balak ang midagsa sa Baybayon ug sa ilang panagway madayag nimo ang sugilanon sa ilang panaw.

Mahanggab nimo, 'humot ang mais nga nilung-ag' diha sa yano nga banay ni Hamber , usa ka higala, nga mao say ulohan niining balak ni Ric S. Bastasa. Yano ug matahom ang gihulagway diha,

'sa usa ka baso nga bugnaw kaayo
nga tubig nga gikan pa sa ilang
banga nga karaan'

Kadtong nakatilaw sa tubig gikan sa banga nga karaan, mabugnawan sa usab ang panumdoman agi niining yano apan matahom nga balak. Bisan kabos sa kabtangan, apan dato kini sa katahom sa yano nga pagkinabuhi ug pagpakatawo. Dili na lang nato isaysay, bation na lang ug sination kining balak diha sa pagbasa ug paghanduraw.

Ang balak nga Kaniadto ni Ric S. Bastasa may giasoy nga kasinatian.

Matod niya, 'gisirad-an ko na ang akong kasingkasing'. Kining panapos nga linya, moabli sa imong panumdoman, sa imong kaagi kaniadto. Ug bisan karon.

Daw dili man makabidli ang Baboy ni Adonis Durado, tungod tingali kay maayo niya pagkasinati ug pagkahulagway niiini, walay pagkataranta.

Sa laing bahin, mora pod ni'g dula nga tagoanay o dakpanay kay dunay mitago, mibutyag, miladlad, mihikap. Mora pod ni'g sangka sa estoryahanay kay naay nagpatuo, naa poy dili motuo. Sangka sa binayloay sa duha ka binuhat, sulod sa tangkal sa Wild Pussy, human sa 9 ka botelya nga Heineken. Kabidli daw ang gihugyawan sa mga butakal, dili kaha ang kalingaw sa nasaksihan nga bugno ug panaglayog nga dili lang sa mga bukton apan sa mga pulong? Igo ra ta motagna, kay wa man ta diha. Ang balak ray atong mabasa, ug sa bantang sa magbabalak, daw kalmado ra man siya, wala mataranta. Ang epekto sa balak, mao sad, dili makataranta. Dili makabidli. Pero, makalingaw. Makahugyaw gyod tingali, kon nakasaksi usab didto sa akto.

Lubi

hamber

tungod sa among panaghigala ni
hamber
nga akong silingan
gidapit ko niya og
paniudto sa ilang balay

siya og ang iyang nanay
lang ang nagpuyo

humot ang mais nga nilung-ag
og tagsa mi og
palotpot nga inon-unan

wala nay dugang

gawas na lamang
sa usa ka baso nga bugnaw kaayo
nga tubig nga gikan pa sa ilang
banga nga karaan

--Ric S. Bastasa

kaniadto

kaniadto
nadungog mo ang akong tingog
diha sa kamingaw
mipahipi ka og nagpakaaron-ingnon
nga bungol

wala mo madungog ang tingog
sa akong budyong
og sa akong kakapoy akong
gigakos ang kahilom og sa silong
sa kahiubos ako mipasilong

kaniadto kadto...

karon wala ka nay madungog sa akong
mga pangagho
wala na ang agulo sa akong pagbangutan

nasayod na ako sa agianan
sa kalipay
ania na kanako ang mga pulong
nga makapaabri sa iyang tinaguan
nga pultahan
ania na kanako ang yabe sa
kinabuhi

ako lamang og ako lang gayod lamang
ang nasayod niini

busa sa dihang ikaw na usab ang gihadla
sa mga anak sa kasakit
og sa ilang tigulang na nga inahan
sa kapakyasan
sa dihang imong gisangpit ang akong ngalan
karon nga ikaw nagpangayo og panabang
wala na usab ako nga makadungog kanimo

gisirad-an ko na ang akong kasingkasing.

--Ric S. Bastasa

Baboy

Ang babaye sa Wild Pussy nga akong gika-table
Human makahurot og siyam ka shot nga tequila
Kalit mikumpisal nga usa kuno siya ka baboy.
Mibuhakhak ko pag-ayo, mora gyud og gigitik

Ang akong ngalangala, ug dihang gitumar nako
Ang gitakigan nga Heineken sa akong atubangan,
Hapit ko sud-ipi gumikan midugang siyag ingon:
“Gani, usa ko ka anay nga may lima ka baktin.”

Ako siyang giingnan nga: “Lagi, tambok ka,
Pero dili gyud ka baboy sa akong panan-aw.”
Mipahiyom siya, mitutok sa libat kong mata.
“Unsa, buot kag pruweba sa akong kababoy?”

Miduol ug mibarog siya sa akong tungod, mipukas
Sa iyang bisti, ug giuyog ang iyang walo ka tutoy.
Nangyam-id ko: “Bisag mag-costume kag dinosaur
Nga traynta ka buok atngal, di gyud ko matarantar.”

Gibitad niya ang akong kamot, gipasok, gipakuot
Sa iyang lubot. “Nakahikap ka sa akong ikog?”
Mingisi ko samtang gahapuhap ang iyang ikog.
“Ganahan lagi kog babayeng magbutang-butang

Og ikog – utgan ko. Unsa ni: latex o synthetic?”
Nakabantay kong mora siyag gisipok – gasurok
Ang tinan-awan nako. Ang duha niya ka bangkil
Migimaw og samot; ang buliskad niyang simod

Daw kasungagon nako. “Nganong man gyung
Di ko nimo tuohan?!” Miiwigik siya, kaluhaon.
Ug gisuwayan nako siyag gakos – mapinanggaon
Nga gakos nga dulot pag-ayo sa iyang tambok.

Kapila ko gihagkan ang balhibuon niyang agtang.
“Pasayloa, pasayloa,” am-am ko, “Din-a mausab.”
Ug ang gainom nga mga butakal sa pikas lamesa
Nangahugyaw sa ka bidli sa nasaksihang drama.

-- Adonis Durado

Baybayon: Ikaduhang Semana sa Hulyo 2009

2009-07-22T22:10:00.000+08:00

Baybayon: Ikaduhang Semana sa Hulyo 2009

35 ka mga balak ang midagsa sa Baybayon.

Daw pakig-sulti sa kaugalingong kalag kining balak 'Nihit nga Subayanan' ni Candice Salazar. Daw dunay panaad, dunay paglaom, dunay tumong. Ug pak-an ang gahom niini kay daw gansa nga molupad, mobiya sa iyang naandan nga kagahapon.

Ang ihilas nga gansa maoy gihulagway sa 'Ang Sugok', kay Candice gihapon nga balak. Ang magbabasa nay mohulagway diha sa iyang handurawan kon unsa gyod ni nga talan-awon. Motidlom ra sad ang handurawan ngadto sa 'bato nga wa nabahiri og kahayag.'

Ang 'Paglakat sa Sayo sa Kabuntagon' ni Ric S. Bastasa nagdalit og kasinatian
nga nahumod sa ulan, diha nahulagway sa tulo ka linya,

'mikalit og ulan
wala na ako nangita og akong
kapasilongan'

Simple nga kasinatian, daw buot mangutana, 'ngano man?', ay di na lang. Kay ubay-ubay pod tingali kanato, nga dili na magpasilong kon moulan. Apan, ngano man magpasingolan? Kon unsay iyang hinungdan, siya ray nasayod. Ug kon unsay hinungdan usab nga ikaw magpasingolan, ikaw ra sad ang nasayod. Suod nga kasinatian kini nga gisalohan sa kadaghanan (nga dili mahadlok sa ulan).

Lubi

nihit nga subayanan

bisbisan ko sa luha
ang mikubol nga liso
sa himaya.
hugasan ko og kasakit
ang mga lama'ng mitapot
sa akong pagkahimugso.
pintalan ko
og mabulokong dugo
ang matag gutling
sa akong palad
ug pangitaon ko
ang tinood nga mapa
sa akong pagpanaw.
kung ugaling
hingpit na ang
hinagiban,
pahilumon ko ang naandan
ug himamaton ko ang
kahibulongan...

--Candice Salazar

Ang Sugok

Sa paglutaw-lutaw
sa ihalas nga gangsa
natukaw ang
gagmay'ng balod
ug gilunod
ang iyang anino
ngadto
sa kinailawman
nga dulom sa
tubig
kauban sa
mga batong
wa nabahiri
ug kahayag

--Candice Salazar

paglakat sa sayo sa kabuntagon

mga tulabong
nanglupad palayo kanako
sa dihang ako
miabot
duol na sa mga kabaw
nga naglunang sa
kabugnaw sa
tunaan
tupad sa bag-ong
gidaro
nga basakan

mikalit og ulan
wala na ako nangita og akong
kapasilongan

--Ric S. Bastasa

Baybayon: Unang Semana sa Hulyo 2009

2009-07-22T08:38:00.002+08:00

Baybayon: Unang Semana sa Hulyo 2009

24 ka mga balak ang midagsa sa Baybayon, ug pipila niini ang mga Haiku ni Candice Salazar nga gikahinaman sa iyang magbabasa. Adunay elemento sa 'surprise' kun 'revelation' kining iyang mga Haiku. Motungha lang sa atubangan sama sa pinintal nga hulagway nga gapahiyom. Moabot lang ug moduaw sa kahimatngonan ug magbilin og alimyon sa iyang presensiya kining mga Haiku niya, sama ning kabahin sa 'damgo nga naanod' ug sa 'bulan sa sapa'. Ikaw na lay basa, kay naa sa pagbasa ang lingaw niininga motungha diha sa kahimatngonan sa magbabasa.

May nasinati pod ko nga rebelasyon niining balak nga 'Mga Talidhay'ni Cindy Velasquez. May pagsabot nga mitungha sa akong kahimatngonan diha sa pagbasa niining pasumbingay

"kining mga talidhay nibukhad
nga sama sa sa usa ka papel.

Apan kini gipilo-pilo dayon
tungod sa atong gilay-on."

(Kapila pa nako, mabalik-balik og basa, usa mitungha ang pagsabot sa gipasumbingayan, kay abi man god nako og gahimo ra tog eroplano nga papel :-)

Lubi

HAIKU

sa kaadlawon
napukaw ko sa unos ~
damgo naanod

--Candice Salazar

Haiku

bato'ng nahagsa
mipusgay sa kahayag~
bulan sa sapa

--Candice Salazar

Mga Talidhay

Bisan tuod gisungog ko
sa mga gutling tungod
sa paghandum sa atong
kulokabildo didto sa Elena Tower.

Kaanindot gihapon balikan niadtong
panahon nga kita gabanos-banos
og pagsubli sa atong mga nasinati,
ug kini gipaambit nato sa isig usa.

Kalit lang, nangatawa ta nianang
kinataw-an sa usa ka bata,
ug nahibulong ta nganong adunay
mga agik-ik nga sama niini.

Ang nakaapan lang, wala gihapon ko
naanad nga sa akong pagpiyong,
kining mga talidhay nibukhad
nga sama sa sa usa ka papel.

Apan kini gipilo-pilo dayon
tungod sa atong gilay-on.

--Cindy Velasquez

Baybayon: Kataposang Semana sa Hulyo 2009

2009-07-03T14:04:00.004+08:00

Baybayon: Kataposang Semana sa Hulyo 2009

105 ka balak ang midagsa sa Baybayon karong semana.

'Ang Bata nga Nangutlo og bulak sa Parke ni Rizal' nga gidalit ni Ric S. Bastasa, nagbilin og hulagway sa pagkabata taliwala sa kagutom ug kalisdanan.
Matod pa sa bata nga biniyaan, kon nganong gikawat kun gipupo niya ang bulak, "iya lang kunong gihimong takyan".
Unsa kahay epekto aning balaka, kon kining pulonga maoy kataposang gibungat sa balak.

Ang 'Usahay Kaniadto' ni Alak K. Caña nagpadayag sa kinaiya sa panahon ug sa tawo taliwala sa kinaiyahan sa kinabuhi. Labing pamug-at sa magbabalak nga
wa nay higayon pa tungod kay 'natapos na' ug kon giunsa niya pagpamug-at ni, makita diha sa pagtandi sa atong simpleng gikawilihan sa kinabuhi, apan dili na mabuhat kon wa nay panahon.

Ang 'Abrihan ko na unta ang mga Bintana
nga Samin' ni Ric S. Bastasa nagsulti bahin sa kalipay tugod sa awit sa tamsi. Apan kining balaka, mipabatyag gihapon og panahon kun higayon nga wala damha ug kalit lang mitungha sa tungod sa kahimatngonan. Tumang kalipay ang gibati. Diin kaha kini gikan, unsang higayon kini mo-awit diha sa kahimatngonan sa tawo? Mangutana na lang ta sa tamsi?

Kining mga balak nga gipaambit sa mga magbabalak gikan sa ilang kasinatian, makatandog usab. Aduna gyoy gahom ning balak sa pagpatakod og pagbati, pagpabatyag sa huni sa tamsi, sa kasingkasing sa magbabalak, ug sa kinabuhi sa bata nga biniyaan.

Lubi

Mosunod ang mga pipila ka mga balak

ang bata nga nangutlo og bulak sa
parke ni rizal

ang bata nga nangutlo og bulak sa
parke ni rizal
gidakop sa pulis
nga dako og tiyan
og iyang gidala sa
prisohan

gipangutana sa
imbestigador kon asa
ang iyang nanay
og tatay

ang iyang nanay
nagpa-maid sa manila
og ang iyang tatay
patay na sa dihang
giburos pa siya
sa iyang inahan

kon giunsa niya ang
maong bulak
iya lang kunong
gihimong takyan

duha na kaadlaw nga
siya walay kaon
kay ang iyang lola
wala na mangilabot
pa kaniya

--Ric S. Bastasa

Usahay Kaniadto

usahay kaniadto
buot natong kumkumon
ang gabon

buot higupon
yamog sa kabuntagon

buot hagkan
ang langit

buot hawiran
ang adlaw

buot hakpon
sanag sa buwan

buot puy-an
ang damgo

himuong kamatuoran
ang handurawan

usahay
ra kadto
kaniadto

karon wala na
tungod kay
natapos na

--Alan K. Caña

abrihan ko na unta ang mga bintana
nga samin

abrihan ko na unta ang mga bintana
nga samin
sa dihang mitugpa ang usa ka tamsi
sa usa ka sanga sa bayabas
nga nag-atubang kanako

miawit kini sa usa ka hamubong
higayon
og ako namati og
wala ako makatingog sa tumang
kalipay

--Ric S. Bastasa

Baybayon: Ikatulong Semana sa Hulyo 2009

2009-06-22T00:13:00.000+08:00

Baybayon: Ikatulong Semana sa Hulyo 2009

Ang misteryo sa ordinaryo kun ang ordinaryo sa misteryo diha sa inadlaw
nga sugilanon kun sa talagsaong adlaw maoy matagamtaman diha sa mga
balak karong semanaha sa Baybayon.

Nganong ang usa ka kumkom nga monggos, labi na'g gisubakan og karne,
makatagbaw na man sa gigutom nga banay. Ingon ani sad ka unodnon ang
balak 'Pangadye' ni Adonis Durado. Gilaga kini sa igong higayon sa
pamalandong. May gibutyag ang monggos diha sa palad ug sa usa ka tawo
taliwala ning kalibotan. Kinsa pa ang dunay ginalaga sa kahiladman
karong mga higayona kabahin sa gibutyag sa gigamyon sa monggos?
Eksistensyal ni nga balak, pangkinabuhi gyod, naghisgot gyod sa pamaagi
sa pagkinabuhi, kahulogan kun kabililhon ning gamating nga kinabuhi sa
tawo. Misanong sa mga pangandoy kun kinaiyayan sa Sidlakanon nga
panglantaw kun pag-ila sa angayan natural nga pagkinabuhi kining
gihulagway sa magbabalak.

"himoa kong tinuod nga tinun-an

sa mga lihok sa mananap,

sa panahon, ug sa palibot"...

"aron kakat-on ko og tahod

sa tanang mga butang

nga wala ko panggaa."

Sama sa monggos, nagpahipi pa ang uban nga kinaadman niining balak. Kon
lagaon diha sa pamalandong, ang magbabasa makakumkom og pipila ka
bililhon nga pilosopiya, pangkinabuhi nga pilosopiya.

Ug ang ang balak nga 'Bugtong' ni Adonis Durado, naghulagway og
kulturanhon nga hitabo. Makahimuot. Makatandog. Apan ang kinauyokan
niini mao ang ordinaryo nga punto, ordinaryo kay masabtan dayon ug
mauyonan sa tanan. Apan, talagsaon, binugtong, espesyal kini nga punto,
kay kini bahin sa pagmahal sa bugtong nga pinangga.

Kon ikaw bugtong gimahal ug gipangga, di ba labihan kanindot? Ikaw na
lang ang mag-prinsesa. Ug Kon ikaw ang magmahal og bugtong hinigugma,
lalim ba? Ikaw na lang ang mag-Hari.

Yuna pa, Nindot sad tong paghipos sa bugtong itlog diha sa tiyan sa
bugtong, sa manok, kanding, baboy, baka, elepante, dili ba? Tinuod ba
ni? Dili impossible.

Ang talagsaong itlog, kun talagsaong pagpangga sa bugtong nga gimahal
tinuod gyod apan dili lalim huptan, kay daghan kaayong kasangitan nga
mga lamian nga putahe, usa maabot ang kinauyokan nga gikabutangan sa itlog.

Ang 'Kapeng Hamabaw' ni Hazelen Calumarde naghulagway usab kini sa
inadlaw kun sa ordinaryo. Ang misteryo nagpahipi diha sa ordinaryo, sama
lang nga ang misteryo motungha pod diha sa ordinaryo. Mao nga uban sa
pagtagamtam sa kape, matagamtaman pod ang misteryo sa sugilanon nga
nagluhod sa 'imong atubangan" Unsa ka ha kini nga sugilanon? Mao na ni
ron, ang misteryo nga nagpahipi diha sa ordinaryong ilimnon. Di ba kaha
mao na ning balak?

Kalingawan man usab ning balak, makalingaw sa magbabasa, makaagni sa
pagbasa, makapainit sa tiyan ug sa handurawan sa magbabasa.

Kape, itlog ug monggos. Ordinaryo ra gyod sila. Apan nahimong mga balak.
Dili ba na misteryo?

Lubi

pangadye

balaan nga makagagahom,

tagai kog lingin nga panabot.

tudloi kong mangayo sa wala.

hagki ang akong kalag

aron kini maglipang –

aron kakat-on ko og tahod

sa tanang mga butang

nga wala ko panggaa.

himoa kong tinuod nga tinun-an

sa mga lihok sa mananap,

sa panahon, ug sa palibot.

gasahi intawn ko panagsa

og sakit sa paglimot.

ug pasayloang gakalampati ko

og sabot sa kamatuoran

ug sa gibutyag sa gigamyon

sa lusok sa monggos

dinhi sa akong palad –

ug ako, niining kalibutan.

-- Adonis Durado

Bugtong

Kung magpatawag ang hari og kumbira,

Magpatumba siyag elepante aron litsunon.

Ug sa tiyan niini idasok ang kinahumotan

Nga lamas, inubanan sa tinibuok nga baka.

Ug sa tiyan sa baka, ilimin ang dugang lamas

Nga gipatabanan og tinibuok nga baboy.

Sa tiyan sa baboy, ang tinibuok nga kanding.

Ug sa tiyan sa kanding, ang usa ka manok.

Ug sa tiyan sa manok, ang usa ka buntog.

Ug sa tiyan sa buntog, ang usa ka itlog --

Nga igahin pirme sa mapinanggaong hari

Alang sa iyang bugtong nga prinsesa.

-- Adonis Durado

kapeng hamabaw

inimnang kape sa tasang kabang
puti ug itom nga lingin
ug may gitas-ong unom ka pulgada

gipatong sa lamesa
hamabaw pa ang nahabilin

gibuhi ang dugo sa katulugon
tibuok palibot nangalimyon

misalom ang mga ngabil
natagamtam sa dila

kalami sa init nga kape
naghatag ug kinabuhi

ning pagtukaw sa atubangan
sa balak nga gisugilon

sa sugilanong nagluhod
sa imong atubangan

--Hazelen Calumarde

Gikan sa: Baybayon

Baybayon: Ikaduhang Semana sa Hulyo 2009

2009-06-15T20:11:00.000+08:00

Baybayon: Ikaduhang Semana sa Hulyo 2009

56 ka balak ang midagsa. Ug kon imong basahon, labi na sa kabuntagon,
matilawan ang kalingaw ug kahayahay.

Daw dula sa duha ka 'dimension' kun sukod sa balak ug sa magbabalak
makita diha
sa 'Garay sa Tawong Di Kamao Mobalak' ni Alan K.Caña. Human magaray ang
balak, may nagpahimangno, dili daw siya kabalo mobalak, sama ra pod sa
pag-ingon
nga ang balak dili balak. Ug matod pa nila, bitaw, ang balak, dili
pulong balaknon. Kay di ba ang balak... "lumoy ang bidlisiw sa adlaw nga
midapat sa akong panit morag halok sa gamayng bata"? Ang balak, dili
pulong. Ang balak kuno sama sa halok sa hamtong, dili na kinahanglan ang
pulong.

Tungod kay naglinog ang kalibotan sa kasingkasing ni Abay Alan, daw
nahugno nga gambalay sa gugma kun ang gihandom sa nahigugma. Makaguol.
Kon dili man ni linog, kalamidad ra gihapon sama sa 'Huwaw' nga maoy
iyang ulohan. Kining iyang hinikay nga kasinatian, kasagaran natilawan.
Bisan handurawan lamang, apan dugo ang gipinta niini. Init ang agay sa
dugo gikan sa nahugno nga kasingkasing, sa pagka pildi diha sa nataran sa
gugma. Dili tiaw ang gugma, makapasmo kon ang hinukad, dili alang kanimo.

Morag naa sa luyo sa sa pultahan sa simbahan kun sa kisame ang halangdon
nga tiki apan sa tinuod lang bisan naa sa langit-langit sa atop, gakamang
intawon. Kining balak, 'Mga Manimbahay' ni Ric S. Bastasa, morag tinuod
morag dili. Ug kon, sublion og basa, makaingon ka nga sambingay usab
kini. Alas 6 sa hapon nahagbong ang tiki samtang si Manang, garosaryo nga
ga-inusara. Dili ba diay daghan ang sambingay sa kamatuoran? Di ba may
kaatbang yuta? Di ba may kaatbang ang kisame? Basta sama sa tiki nga
gapahipi, mahagbong ra gihapon, kana, kon dili ma-ipit sa sira sa
haw-ang nga simbahan.

Kon unsa man, ang mga balak sa Baybayon gahulagway sa kalibotan sa
kamatuoran, handurawan, kasinatian, pagtuo, ug uban pang lamas sa
kinabuhi ubos sa lamdag sa kaamgohan kun kahimatngonan sa magbabalak.

Lubi

Kining mosunod mao ang gihisgotan nga mga balak:

garay sa tawong di kamao mobalak

bugnaw ang huyoyhoy sa hangin
nga misapigad sa akong aping
buntag sayo sa akong pagmata

mga dahong laya sa mansinitas
hinay-hinayng nangatagak
sa umog nga tugkaran

mga gihay sa sagbot nga balili
gikapyotan sa kamig nga yamog
nananghalok sa yuta

lumoy ang bidlisiw sa adlaw
nga midapat sa akong panit
morag halok sa gamayng bata

kanindot untang himoan ug balak
sa gibati ko karong buntaga
agda kanako sa akong kasingkasing

apan
unsaon man
di man ko magbabalak

kalawaton ko na lang
ang kalalim nga gihalad
karon sa kabuntagon.

--Alan K. Caña

Huwaw

Taud-taod nang walay sagbot
sa daplin sa dalan.

Nagmala na lang ang tunaan..
Nag-uga na ang kahumayan.
Ug wa nay bisan usa ka mais
nga nagbarog sa daruhan....

Nipis na lang kaayo
ang agos sa tubig sa dakong sapa…

Sihag na ang kanhi
huot nga kalibonan.

Nahanaw na ang mga saging
nga nagpunsisok sa tiilan sa bungtod

Uga! Uga! Uga!
Uga ang tibuok kong kalibotan!

Wala nay tubig.
Walay kahoy,
sagbot ug tanom.
Wala nay bulak.

Wala nay bisan gamay na lang nga mugna
nga moturok pa ning akong kasingkasing!

Wala nay bulok ang kinabuhi,
sukad akong nasuta ug nahibaw-an
nga siya ug dili ako
ang matuod mong gihigugma.

--Alan K. Caña

mga manimbahay

giihap nako
mga dise-otso kabuok
ang nanimba karong
buntaga
ang simbahan
morag haw-ang
kaayo
ang hangin naglapos
lapos sa
mga dagkong bintana
og ang mga langgam
naglupadlupad
niining dakong
hawanan sa mga
santos

ang miawit sa
responsoryo
nga konsehala usab
ning lungsod
namong mingaw
haskang yabaga
mora bag ang iyang
tingog
gilukat pa sa
lalom kaayong
atabay

og ang sakristan
nga nagkilingkiling
sa bagting
bulingiton og
dagway

ang tigbagting sa
kamapanaryo
opaw, niwang
og morag dunay singko
sa ilok

ang manang nga
tig-lead sa rosaryo
sa kaadlawon
nag-inosara lang
kay nag-iyahay na
og panglupad
ang iyang upat
ka anak nga
dalaga

ang kantora dunay
siging giguyod-guyod
nga anak nga lalaki
nga giuban na
nga para gasto lang
mokurog ni siya
kon imong
tutukan

ang among bag-ong
kura paroko
gustong mag-abogado
og karong gabii
ako ang iyang
maestro

daghang iti ang altar
sa simbahan
og wala magtarong
ang mga sinaligan nga
gitahasan og
pagpanglimpyo
sa matag adlaw

bag-o lang
mibalik og simba
ang akong amigo
nga kontra sa
among ex-kura-paroko
nga gibalhin na og
laing simbahan

og ang babayeng
nauyab sa among
kanhiay nga kura paroko
nag-uli na man diay
kuno sa iyang
banang nagpagsug-o

--Ric S. Bastasa

Gikan sa Baybayon, http://balakbisaya.blogspot.com

Malipayong Adlaw sa Kagawasan

2009-06-12T20:47:00.001+08:00

Hulyo 12, 009
Malipayong Adlaw Kalubihan
Malipayong Adlaw sa Kagawasan

Malipayong Kasaulogan
Unsa nga Kagawasan ang dugang i-saulog sa atong Nasod nga Pilipinas?
Unsay dugang nga Kagawasan alang sa atong katawhang Bisaya?

Ang Kalubihan naghinaot mokaylap ang /Kalambigitan Bisaya, Kalibotang
Lunsayng Binisaya/.
Kalamboan ang bunga sa Kalubihan nga gimanggad. Hingpit ug
pangkinatibuk-an kun malukpanon nga kalamboan sa kinabuhi isip Bisaya.
Kalamboan sa atong kaugalingon, lakip na'ng kaugalingong tanaman kun
kultura ug pinulongan.

Mga taga-Kalubihan,

ipalanog ta ang tingog sa atong nasod, ang dungog sa atong kaliwat.
Labyog Bisaya! I-palanog alang sa dugang nga kagawasan ug kalamboan.

Padayon ta'g labyog-labyog sa Kalubihan
Padayon sa panikaysikay diha sa imong payag sa Kalubihan.

Kaabay,
Lubi

Unsang Semana sa Hulyo 2009 sa Baybayon

2009-06-09T19:52:00.001+08:00

Baybayon: Unang Semana sa Hulyo 2009

Gikan sa 73 ka balak ania ang 3 ka dalit alang sa atong kalingawan. Gilas sa pagkabisdak diha sa balaknong panghunahuna ug pagbati ang gipadayag luyo, ubos, taas, hubo kun diha sa dulom,kangitngit, may dan-ag kun kahayag, diha sa kasilyas, sa panimalay, sa trabaho, sa simbahan, kun bisang asang dapit
nga gapabuhagay ang magbabalak sa iyang sensibilidad.

Daygon ta ang inodoro

Wala nay mas halangdon pa
kaysa sa uyamot nga inodoro.
Sumbunganan, kumpisalanan
sa pinugngan nga sikreto.
Hungawanan, habwaanan
sa gikalibangang pagbati.
Kiniy dunggan nga mamati
kanunay sa tawhanong
tawag sa panginahanglan.
Ang trono sa kadungganan
sa hari ug sa timawa,
sa santo papa ug sa erehes,
sa pilosopo ug sa way tahor,
sa terorista ug sa heneral.
Way paltos kining mosapupu
sa di ka kahilisag pagtuo,
sa nagka-igit-igit sa suliran,
sa gipangtubol sa konsensya.
Busa, tinahod kong higala,
idalit ta sa balaang inodoro
ang kinahugtan tang utong.

-- Adonis Durado

pagkahuman niining tanan

pagkahuman niining tanan
lantawon ko ikaw
nahinanok ka pa

idibuho ko ang larawan
sa usa ka tutok nga
nakiglambigit sa kaanyag
anang kahilom

mobangon ko og isul-ob
ko og balik ang akong pantalon
nabati mo ang kasikas sa akong
pagkabalisa
mimata ka og milantaw usab
kanako
usa ka hubo nga kalag nga
mobalik og suot sa iyang lawas

gibalikan ko ikaw
mitupad ako kanimo
nag-iyak ka pabalon sa akong
pagpanamilit
gidapion ko ang akong kamot
sa imong ngabil
og gipapas ang imong mga luha
nga mibanaw diha sa
imong aping

namalihog ako
nga pagkahuman niining tanan
ilubong natong duha
ang mga tam-is nga handurawan
diha sa mga balas
sa tumang kalimot

magpakahilom ako
sama sa pagsulsi nimo sa nagisi
nakong panyo

--Ric S. Bastasa

Saputon ko kung tawgon ko nimog sapyot

Ibutang ta lang nga mabaw kog kigol --
mubo rag pasensya -- maong dali rang
saputon kung tawgon ko nimog sapyot.
Apan timan-i bayang ang atong sampot
sumpay ras utok. Ug kung imong initan
ang akong lubot, way tiawng gituhik
mo ang igot-igot sa akong pagkatawo.
Sige, ibutang ta nga sapyot kog lubot,
apan igwad baya kaayo kog hunahuna.
Ug maantigo nga motaod sa akong
kibot dihas akong baba: Animala ka!
Pisteha ka! Panuwaya ka! Koleraha ka!
Ka hinawayon gud nimo, inataya ka!
Kung kalimot kag panamin sa imong
kaugalingon, pwes, pahinumduman tika:
Kanang lisngag mong ilong, manghod ra
nas tambutso. Kanang lihang sa budlat
mong mata, kaagian nag trak de karga.
Kanang dangas mong agtang, pwedeng
katugpahan og traynta ka helikopter.
Kanang dunggan mong tangkag kaayo,
kuwangan nag kasko aron kalayagan.
Kanang imong pangag lupig pay gabas!
Imong suwang lapad pa sa planggana!
Ang lagom mong wait itom pas alkitran!

-- Adonis Durado

Balita Kalubihan

2009-05-29T12:12:00.001+08:00

Mga Abay,

Gapadayon ang panikaysikay sa Kalubihan alang sa panglantaw nga
magkalambigit ang tanang mga Bisaya ug molambo ang
kalibotang BINISAYA
/
Ang Kalubihan, Kalambigitan Bisaya, Kalibotang Lunsayng Binisaya./

Unsay bag-ong gisugdan karon? Ang dagitabnong mantalaan sa Kalubihan,
BALITA KALUBIHAN, gihimo
aron kalingawan sa mga taga-Kalubihan labi na sa mga tigsulat og mga
balita ug panahom mahitungod sa mga panghitabo sa ilang
kaugalingong palibot, kun kalibotan.Adtoa lang sa:
http://balitakalubihan.ning.com

Kon interesado, /sign up/ lang. Dayon.
Sugod pa lang gyod ni, usa pa lang, si Joe, ang naghinamhinam nga
miboluntaryo sa pagsulat kun pagtaho sa mga balita gikan sa iyang dapit,
sa Cagayan de Oro.

Kon kinsay interesado nga mahimong tigsulat ,tigdumala, tig-edit, ug
uban pa dinhi sa Balita Kalubihan padayag lang sa kahinam, aron
imbitahan ug mahimong kaabay
sa maong proyekto. Sulayan lang ni. Sulayan og pulos sa mga himan sa
/dagitwanang/ (cyberspace) kun sa /tingbigit/ o/ tilingbigit/
(internet) . Pahimuslan nato kining /katilingbigitan /alang sa
pagpauswag ug pagpalambo sa atong pinulongan, kultura kun katawhan.

Padayon ta sa pakiglambigit. Puslan ta ang /tingbigit/ o /tilingbigit/
(internet)

Kaabay sa panaw,
Lubi

P.S. Makalingaw ni basahon, makataas og kilay:
http://www.wired.com/culture/culturereviews/magazine/17-06/nep_newsocialism?currentPage=all

Baybayon 24-25

2009-05-25T21:48:00.000+08:00

Karong Mayo 24-25, midagsa sa Baybayon ang 27 ka mga balak,
may pipila naggaray kabahin sa relasyon, sa kaminyoon, panag-uyab ba
hinuon, sama niining mosunod:

Ang Hardin sa Akong Galamhan, ni Ric S. Bastasa, simple ug deretso sa
punto, lunhaw nga handurawang sa kabulakan, matunok ang patakag pamulot.
http://balakbisaya.blogspot.com/2009/05/ang-mga-hardin-sa-akong-galamhan.html

Mahadlok Kong Mangimbitar Nimo Sa Balay, ni Adoni Durado, bug-at ang
pagbati, apan makahuloganon, bisan kahadlok ang galubog sa lim-aw,
milutaw gyod gihapon ang talagsaong kaisog sa paghigugma, matahom sama
bulak sa lotus
http://balakbisaya.blogspot.com/2009/05/mahadlok-kong-mangimbitar-nimo-sa-balay.html

Ginapos Sa Handurawan, ni Hazelen Calumarde, dayag ang ang pagbati,
masabtan ang kasinatian
http://balakbisaya.blogspot.com/2009/05/ginapos-sa-handurawan.html

Mayo 21-23 sa Baybayon

2009-05-24T16:58:00.001+08:00

Mayo 21, 22, 23

midagsa ang 42 ka mga balak sa Baybayon ga-asoy sa mga tawhanong
sugilanon sa yuta nga may tinipigang balak lambigit sa langit.

Usa Ka Dekadang Kaminyuon, ni Adonis G. Durado

http://balakbisaya.blogspot.com/2009/05/sa-usa-ka-dekadang-kaminyuon.html

Pakighiusa sa Bathala, ni Candice Salazar

http://balakbisaya.blogspot.com/2009/05/pakighiusa-sa-bathala_21.html

Nianang Adlawa, Nawani ko ang Ginuo

http://balakbisaya.blogspot.com/2009/05/nianang-adlawa-nawani-ko-ang-ginuo.html

Mayo 19-20 sa Baybayon

2009-05-21T00:14:00.000+08:00

Mayo 19-20

Miabot sa Baybayon ang 23 ka mga balak, sama niining mga balak nga
nanghimuta pa lamang sa kabuntagon
apan gihadla na dayon sa higanteng bug-at, bug-at nga hagit sa
paglimot, sa pagkatagak, sa kainit.

Drama Sa Duha Ka Kamot, ni Ric S. Bastasa
http://balakbisaya.blogspot.com/2009/05/drama-sa-duha-ka-kamot.html

Ang Pagkatagak, ni Candice Salazar
http://balakbisaya.blogspot.com/2009/05/ang-pagkatagak.html

Ang Hagit Sa Adlaw, ni Hazelen Calumarde
http://balakbisaya.blogspot.com/2009/05/ang-hagit-sa-adlaw.html

Baybayon Mayo 18

2009-05-18T23:18:00.001+08:00

May 18:

May 19 ka mga balak ang midagsa sa Baybayon.
Nag-asoy, nagtigmo, naghulagway og talinghaga sama niining pipila,

Paghandum sa Akong Puppy Love,
ni Ric S. Bastasa, kon mainom pa lang unta balik ang kagahapon sa
batan-ong gugma.
http://balakbisaya.blogspot.com/2009/05/paghandom-sa-akong-puppy-love.html

Makawalhon
ni Adonis Durado, simple, makalingaw, matalinghagaon.
http://balakbisaya.blogspot.com/2009/05/makawalhon.html

Tigmo sa Moralidad
ni Ric S. Bastasa, kon unsay tubag pangutan-a si James Joyce.
http://balakbisaya.blogspot.com/2009/05/tigmo-sa-moralidad.html

Mayo 15, 16, 17 : 37 ka balak sa Baybayon

2009-05-17T12:29:00.000+08:00

Mayo 15, 16, 17,
miabot sa Baybayon ang 37 ka mga balak nga nagpabuhagay kabahin sa
kaugalingong pagbati ug pagtuo. Nagkadaiya ang gihisgotan bahin sa
relihiyon, relasyon, pamilya, kaugalingon, ug uban pa. Gititik ang mga
gihambin nga panglantaw sa kinabuhi, gugma ug sa kamatayon. Anaa ang
pagmahay, ang paglaom, ang pangindahay, ang pagpauraray.

'Sa Human Nianang Panagbulag sa Kahayag ug sa Kangitngit', ni Ric S
Bastasa
http://balakbisaya.blogspot.com/2009/05/sa-human-nianang-panagbulag-sa-kahayag.html

Mayo 15, 'Mga Haiku Ko' ni Adbent daw mensahe sulod sa botelya nga
gianod-anod sa mga balod unya daw gapnod nga gisapnay sa bukton sa
Baybayon. Mga pangindahay, pangutana, pagbati, ang sulod sa moang
mensahe gikan sa kahiladman sa tagsulat. Matagamtam dinhi:
http://balakbisaya.blogspot.com/2009/05/mga-haiku-ko_15.html

Domingo, ni Ric S Bastasa
http://balakbisaya.blogspot.com/2009/05/domingo.html

Mayo 11-13 Hunas sa Baybayon

2009-05-14T15:56:00.003+08:00

May 11, 12, 14 Tinghunas karon sa Baybayon, 8 lamang ka mga balak ang midagsa, kay tingali, tugnaw pod...sige'g ulan

Bisan unsa pa
ang ilang kilawmon.
Ug bisan pa mokirig
ang akong mga tudlo
sa kabugnaw sa balud.

Kinutlo gikan sa:

Ang Dagat ug ang Mananagat, ni Cindy Velasquez

Bugnaw basahon ni nga balak, hapsay morag gapahayahay sa bas sa lapyahan, ...

"Ug bisan pa,
ikaw ang dagat
ug ako ang mananagat."

Mosulong pod, managat pod, dili lang maglingkod :-)

"Ang mga tiil sa awit miramparampa, nagtunobtunob sa akong mga damgo...",way ulohan nga balak ni Ric S Bastasa, subaya lang ninyo (ang kutay ngadto sa iyang mga balak sa Mayo 11) kon diin nahulog ang lusok sa mga luha. Inato gyod kaayo sa iyang gihulagway.

Paglakaw sa Dalan sa Gugma,, ni Hazelen Calumarde nga nagkanayon..."maghinay hinay sa mga lakang..." kay basig madalin-as, dangog ang dalan sa gugma, makatagam... :-)ang kalami sa mabundak.

Adlaw sa Inahan, Balak sa Baybayon

2009-05-10T10:28:00.003+08:00

Mayo 8, 9, 10,
Midagsa ang 6, 13, 5 ka mga balak, 25 tanan, apan sayo pa karong adlawa, Adlaw sa Inahan, uban sa mga balak pagdayeg ug pagdumdom sa kaugalingong inahan, modagsa pa tingali ang ubang mga balak sa Baybayon.

Sa Pagkamatay ni Nanay

Samtang Nagtindog ka Atubangan sa Dagat

Ang Balas Sa Imong Palad, ni Hazelen Calumarde

Mga Balak sa Baybayon

2009-05-07T10:13:00.002+08:00

Mayo 5, midagsa ang mga balak ni Alak K. Caña
Inubanan kini sa balak ni M.D.K, Sa Ibabaw Ang Inidoro morag psychedelic Sunny Side Up
Ug 'Ang Pagpangandam sa Kamatayon' ni Hazelen Calumarde

Mayo 6, may pipila ka balak nga miabot sa Baybayon, sama niining Mamasura,hayko gidalit ni M.D.K.

Mayo 7, ubay-ubay nang balak nga gihikay ni Ric S. Bastasa, mikabat nag pulo ka buok.

Mga Balak sa Mayo 4

2009-05-04T22:56:00.004+08:00

Ang Iloy, ni Ruby Balandaan, "siya nagapabilin nga mabakod
wala kabatyag sang kakapoy". Balak ni alang sa mga inahan.

KULBAHINAM, ni Alan K. Caña, naghulagway ..."diay sa tago
og duga sa pawikan
king himan ko sa himaya?"

Gitubag pod sa balak ni Ric S. Bastasa, Ang Suba Sa Himaya, "kay ang sulog sa suba paingon sa himaya
kusog
walay kahawiran
ato rang dunggan"

Unang Balak sa Mayo

2009-05-04T00:22:00.002+08:00

Unang mga adlaw sa Mayo, midagsa ang 23 ka mga balak sa Baybayon.

Ang Katunggan sa Borbon, ni Jay V. Armero, nagkanayon "Kon unsa ang dangatan sa atong mga katunggan
Kon dili nato tamnan og prinsipyo nga gipadangat
sa atong mga kabatan-onan."

Nasuko si Papa, ni Ric S. Bastasa kay ngano man diay og naningkamot paghimo og silya?

Ako Kana, ni Alan K. Caña

Halad-uli, ni Lukas Makapuling, kon ang halad balibaran...unsaon man?

Atubangan sa Samin diha sulod sa iyang Banyo, ni Ric S. Bastasa.

Bisan sa Damgo, ni Hazelen Calumarde, morag tinuod nga damgo.

Pacquiao v.s. Hatton

2009-05-03T11:06:00.001+08:00

Makita ang dula ni Pacquiao vs. Hatton
sa Kalubihan ug Radyo Bisdak

Domingo May 3
12:54pm [Oras sa Pilipinas]

Nagkadaiyang Balak

2009-04-30T10:52:00.003+08:00

Ning tulo adlaw, 19 na ka ablak ang miabot sa Baybayon.
Abril 28, 29, 30...mibanlas ang nagkadaiyang balak sa Baybayon. Makalingaw. Makahinuklog. Makatando. Makahagit. Makapukaw.

Ang Kapong sa Pier sa Dumaguete ni Ric S. Bastasa, makahimuot.
Ang aslom sa kagabhion, nahimong pait sa kabuntagon.

Didto Sa Negros ni Ric S. Bastasa, naghulagway sa duha ka matang sa tawo sa maong dapit.

Ang Dikotomiya sa Tambaloslos nga Nangawkaw sa Trono ug Usa ka Adik nga Nanghay-ad sa
Starbucks, ni M.D.K. nagpabuhagay sa mga pagbati diha sa panghupaw sa balaknong pulong.

Kagabii Nalupig Ko sa Away ni Ric S.Bastasa, miangkon sa iyang kapildihan, malipayon nga pagsugilon.

Haiku; Wakwak naa na gyod tay Haiku sa Wakwak, gidalit ni Candice Salazar

Ang Gilay-on sa Gidul-on, makahimuot nga balak ni Adonis Durado. Sa paglantaw sa bildo sa bintana sa tren wala milahos ang panglantaw sa gawas...

Usa ka balak ni Ric, naghulagway sa usa ka tawo sa pipila ka pulong lamang, "ang akong kasingkasing gahig ulo, ang akong ulo walay kasingkasing..." Mabasa dire.

Usa Ka Gatos nga mga Toro ni Ric S. Bastasa, unsa na lang kaha kon makabuhi, nabalaka ang nangutana.

Nagsugod pa lang ang adlaw karon, 6 na ka balak ang miabot sa Baybayon.
Kon duna kay tinipigan nga balak, kun lab-as nga balak, ipadala sa balod sa Baybayon, agi dire lunsayngbinisaya.baybayon@blogger.com, isulat lang imong ngalan aron masayran ang tagsulat.

Laing paagi sa pagsalmot, magpahimong Tig sa Baybayon, tigsulat o tigdumala o tigpanindot sa Baybayon, aron mas daghan magpicnic ug malingaw dinhi.Padala lang og sulat sa Tugkaran

Padayon Tag Labyog,

Lubi

Balod sa Baybayon

2009-04-28T00:34:00.003+08:00

Abril 27, gianod sa mga balod ang mga balak ni Ric S. Bastasa, ug 9 kabuok ang gisapnay sa Baybayon :

Type ug Ang Galot. Naa pay balak niya didto, apan way ulohan, ang unang linya nagsugod, 'migilok na usab ang akong ilok...' Duawa ang Baybayon, madungog ang mga balod nga miduyog sa mga balak.

Abril 26, may midagsa nga 5 ka balak:

Hunahuna ni Marjohn Presbitero, pabuhagay sa nalamdanan nga hunahuna.

Ug si Adbent namalihog sa iyang balak, Awita Ang Awit Ko. Morag si Bay Uray tingali ang gipadunggan ani. Pangagpas ko lang. Kay si Bay Uray, mahiligon mogama og mga awit Binisaya, ug ubay-ubay na nga balak ni Adbent nga gihimoan niya og tono. Hangyo lang pod mo kay Bay Uray, taga-Kalubihan siya.

Ug may Talithi hinungdan sa pagbaha sa luha, gidalit ni Ric S. Bastasa. Naay pagkasuryal ni nga balak, apan dili pod malimod ang ka-ordinaryo nga kahimtang ang gihulgway, except na lang kon ikaw ang giabtan sa ulan. :-)

33 Ka Balak

2009-04-26T00:31:00.004+08:00

33 ka balak ang midagsa sa Baybayon sa petsa Abril 25

Pagtidlom sa laglom nga sambingay sa kinabuhi, pagtugkad sa kahulogan sa pagpakabuhi, pabuhagay sa pagbati ug uban pang tawhanong kasinatian maoy kasagarang balak nga gibanlas sa Baybayon karon. Panghamtong ang hulagway. Alang sa mga edaran lamang.

Prinsipyo ni Ric S. Bastasa

Ang Toro-Toro ni Ric S. Bastasa, gapamatuod sa kaniadto hangtod karon.

Unsa ba ang imong Panaw ni Ric S. Bastasa, yanong obserbasyon sa yanong kamatuoran.

Salamat sama sa tubig sa busay mipahumok sa tig-a nga bato.

Haiku; Haw-ang ni Candice Salazar, sinati-a.

Bulak ng Felini Hazelen Calumarde paambit sa suod nga pagbati o kasinatian, saksi ang bulak ng Feli.

Pagkahuman, Gugma, Pagpaabot

2009-04-25T00:31:00.002+08:00

Abril 24, 5 ka balak ang gibanlas sa Baybayon sama sa:

Pagkahuman ni Ric, gapadayag nahuman ug gusto pa balikan.

Gugma,ni Rachelle Arlin Credo, hubad sa 1 Cor 13.

Pagpaabot tidlom sa kasinatian sa tawo kini nga balak ni Ric S. Bastasa.

Balak sa Baybayon

2009-04-23T22:38:00.004+08:00

Karong adlawa, petsa 23, miabot 16 ka balak ang gibanlas sa Baybayon

Giango-ango sinulat ni Adbent, naghulagway sa ilang 'Pinanggang Nanay' sa panimalay, ang ilang lola.

Soneto Avantgardo: Tigmo sa Orom nga Way Ugma, ni M.D.K. nagkadaiya mahanduraw..."lima ka galansiyang naghagwa, nagduwa'g chinese garter ug takyan."

Adunay Paghawid ni Ric S. Bastasa bahin sa nagkadaiyang paghawid kun kahulogan sa paghawid.

Duha Ka Haiku: Sa Balilihan gidalit ni Candice Salazar

Gahapon petsa 22, may 12 ka balak ang gibanlas sa Baybayon.

Virgin ni RSB, usa ka balak nga may sugilanon

Bidlisiw ni Akoy, usa ka mubong garay, usa ka kasinatian.

Buriskas ni Hazelen, naghulagway bahin sa buriskas, kon unsa ning buriskas.

Paambit lang sa imong balak dinhi, lunsayngbinisaya.baybayon@blogger.com isulat lang imong ngalan aron masayran.

Garay Sa Pulong

2009-04-21T23:15:00.003+08:00

Sa Baybayon,

Ang Kaasgad, sinulat ni Ric S. Bastasa, usa sa unom ka balak nga midagsa sa Baybayon gahapon, petsa 20 sa Abril. Gapangutana kini nganong asgad ang dagat, nganong dili man sama sa...

Ang Luha..."nangita kana
og pultahan..."padayag gihapon ni Ric.

Karong adlawa petsa 21 sa Abril, nagtubag-tubag ang balak ni Ric S. Bastasa ug Hazelen Calumarde, bahin sa kabililhon sa 'Pulong' nga nakadasig pod ni Adbent sa paghan-ay sa iyang gipahinungod ni AngelnJuly, ang Garay sa Pulong

Padala lang sa inyong balak dinhi,
lunsayngbinisaya.baybayon@blogger.com

23 ka balak

2009-04-18T00:13:00.004+08:00

Petsa 17, miabot og 23 ka balak ang midagsa sa Baybayon

Kinabuhi sa Saudi gihulagway ni Adbent ang kahimtang sa langyawng dapit.

Haiku: Mga Isyu sa Katilingban gihulagway ni Marjohn Presbitero agi sa Haiku ang mga isyu sa Katilingban.

Ang Bagyo Kagabii ni Ric S. Bastasa, nangandoy sa bagyo, ngano ka ha?

Pulaw Haiku nga gidalit ni Hazelen Calumarde.

Midagsa ang dagkong balod karon sa Baybayon, ubay-ubay nga balak ang miabot.

Padala sa inyong balak dinhi sa lunsayngbinisaya.baybayon@blogger.com

Miabot sa Baybayon

2009-04-17T12:17:00.007+08:00

15 ka balak ang gibanlas sa Baybayon gahapon, petsa 16 sa Abril.
Tipik Lamang ni Ric S. Bastasa, mubo nga balak, kurats pod pagkahan-ay.

Lakang usa ka choka, sinulat ni Hazelen Calumarde.

Karong adlawa, petsa 17, upat (4) pa lang ka balak ang miabot sa Baybayon.

Padala og balak sa Baybayon, butangi lang og signature, imong ngalan aron mahibaw-an asa gikan.

Haiku Gibanlas sa Baybayon

2009-04-14T22:23:00.003+08:00

Petsa 13, 11 ka balak ang gibanlas sa Baybayon
Petsa 14, 15 ka balak ang miabot sa Baybayon, pipila niini mga Haiku sinulat ni Hazelen Calumarde ug Akoy.

Sa kaganihang hapon gihulagway ni Ric S. Bastasa ang gidangantan sa sa usa ka pispis nga natagak gikan sa salag.

Adunay haiku kabahin sa Dahon ug Anino

Hunas-Taob sa Baybayon

2009-04-11T22:06:00.002+08:00

Mga Balak sa Baybayon.

Abril:
Petsa 8, 11 ka balak
Petsa 9, 1 ka balak
Petsa 10, 11 ka balak
Petsa 11, 1 ka balak (alas, 10 sa gabii, basin madugangan pa)

Mohunas-motaob ang Baybayon Balak Bisaya.

Pasundayag sa Semana Santa

2009-04-09T19:05:00.002+08:00

Sa Kalubihan, adunay Pasundayag sa Semana Santa.
Matagamtam ang mga balak, pamalandong, salida, ug drama nga may kalambigitan sa Semana Santa.

Duawa lang ninyo http://kalubihan.ning.com

Gahapon, 11 ka balak ang gibanlas sa Baybayon ug kadaghanan niini may kalambigitan sa Semana Santa.

Lubi

7 Ka Balak Semana Santa

2009-04-08T13:29:00.003+08:00

Nagpadayon pagbanlas sa mga balak ni Ric S. Bastasa ug Hazelen Calumarde ug Adbent didto sa Baybayon

Ang 'Sa Akong PagkaKatoliko' ni Ric S. Bastasa gibutyag sa magbabalak ang iyang pagbati ug paghunahuna, pagkumpisal sa iyang kasinatian ug pagtuo.

'Pasaylo Ako, Nagbasol Ako'ni Hazelen, nagpabuhagay sa mga pagbati ug kaamgohan ubos sa lamdanan sa panag-ingnan ug mga pulong ni Kristo.

'Akong Krus' ang magbabalak nagbutyag usab sa iyang gipili nga krus.

Pasalamat ta kanila sa ilang mga balak nga naghulagway sa atong pagkatawo.
Udtong tutok pa lang, ubay-ubay na nga balak ang gibanlas sa Baybayon.

Kon duna pod moy balak pamalandong nga ipaambit ipasakay lang sa Balod aron moabot sa Baybayon Balak Bisaya.

Lubi

10 Ka Balak

2009-04-07T23:18:00.003+08:00

10 ka balak ang gisapnay sa Baybayon karong adlawa, nagtubag-tubag ang mga balak ni Hazelen Calumarde,Labyog sa Tangse sa Hunasan sa Cancainap ug ni Ric S. Bastasa, Pasyon. Ang Giuhaw ni Adbent gibanlas pod sa Baybayon.

Mao ning pipila nga may gipunting sa kasingkasing sa tawo ug sa iyang espiritu. Kon unsay makatandog kanimo sa pagbasa niini, masayran ra nimo. :-)

Lubi

gipangita nimo ang kalinaw

2009-04-07T00:28:00.001+08:00

Saw-an nato ang mga lab-as nga balak ni Ric Bastasa, 'Gipangita nimo ang Kalinaw' ug Adbent, 'Maglalangyaw'

Pipila pod ka balak ang napahiluna sa Baybayon karong adlawa.

Sa Dihang Miabot ang Kahayag sa Kabuntagon

2009-04-05T14:35:00.004+08:00

Gisapnay sa Baybayon ang pipila ka lab-as nga balak ni RSB (Ric S. Bastasa), ug nasinati nako ang kanindot "Sa Dihang Miabot ang Kahayag sa Kabuntagon"

Agi niini nga estilo napasinati sa tagsulat ang iyang kasinatian ngadto sa tigbasa.

Pagtuo Bisaya

2009-04-04T08:31:00.001+08:00

Adunay sinulat si Bay Alan, 'Ang Akong Pagtuo' ug si Lubi,'Kwaresma' nga mabasa karon sa Tanaman Pagtuo Bisaya.

Duha Ka Balak ug mga Pasundayag

2009-04-03T23:52:00.004+08:00

May lab-as nga balak, duha ka balak nga gihikay ni Inday Hazelen, Ang Katakos sa Kawayan

ug ang Sabaw sa Tinunuang Utan

Gibanlas na sa Baybayon.

Si Marjohn Presbitero ang usa sa mga tag-sulat sa Baybayon, mipaambit sa iyang Kauhaw.

38 ka balak ang gibanlas sa Baybayon sa miaging bulan sa Marso. Karong bulana, 10 na ka balak ang gisapnay sa Baybayon.

Kon duna kay tinipigan nga balak, ipadala lang sa balod nga mohatod niini paingon sa Baybayon. Ipaanod dinhi

Deretso ni nga ibanlas sa Baybayon.

Ang ulohan sa dsulat (email) maoy mahimong ulohan sa balak.

Isulat lang pod imong ngalan aron mailhan kon kinsa ang tagsulat.

Pahibalo, adunay Pasundayag sa Kalubihan, pasundayag sa mga mugna sa katahoman sa mga taga-Kalubihan. Ayaw lang mo katingala nga apil ang pahiyom ni Butong, babayeng taga Mindanao, kay talagsaon pod ang mugna niya nga yuhom.

Lubi

EL CUEZON, salamat sa balak

2009-03-31T17:54:00.003+08:00

Salamat EL CUEZON

sa imong mga balak!

Ubay-ubay ang mga balak nga gibanlas sa Baybayon Balak Bisaya

Gitanom pod sa Tanaman Hubad Bisaya
kay may hubad Inenglis pod ang iyang mga balak.

Kon duna kay balak nga buot nimong ipaabot sa Baybayon idretso lang padala sa: lunsayngbinisaya.baybayon@blogger.com

Lubi

"PANGURAKOT OG PAMILYANG MANGURAKOTAY"

2009-03-21T12:24:00.002+08:00

Ang hinubad ni Bay Jesse Baring "PANGURAKOT OG PAMILYANG MANGURAKOTAY" nga sinulat/pamulong ni Obispo Socrates B. Villegas, gipatik kun gitanom na karon sa Tanaman Hubad Bisaya ug sa Katawhan Bisaya
Pagbalik sa yano nga banay, yano nga pangandoy, yano nga kinaiya ug pamaagi sa pagpuyo, maoy gituboy sa maong sinulat. Maayo basahon, maayo pagkahubad.

Mubong Kurso sa Pagsulat og Sugilanon

2009-03-21T10:12:00.002+08:00

Ang Mubong Kurso sa Pagsulat og Sugilanon, napatik na sa Tanaman Sugilanon Bisaya
apan dihang gihikay ni sa Kalubihan, nakadasig gyod sa atong kauban nga gadumala sa hugpong 'Mubong Sugilanon', ug bahin niining Kurso ug sa Bisaya magazine, mao ni ang iyang tugon:

Tinahud nga Omar Khalid:

Nadasig kaayo ako nga molingkod aron mosulay ug sulat ug mga sugilanong binisaya tungod niining imong kurso sa itaas. Sa pagkamatuod lang tungod niini tingali ug makatampo na ako sa mgu umalabut nga semna. Mahimo ba nga iposte ang direkyon email sa imong editorial desk mantalaan'g Bisaya aron sa pagmasayon sa pagpadala ug tampo? Ug usab palihug kining akong pakisayod ug mahimo ba nga himoon ako ninyong "circulation and distributor for Bisaya and Liwayway in Southern California?"

Renato F. Gutierrez
12784 Pinebrook Ct.
Moreno Valley, California 92553 USA
manlalaban@earthlink.net

Kalubihan: Mubong Sugilanon

Mga Balak ni Abay Renato Gutierrez

2009-03-21T09:59:00.003+08:00

Sa Baybayon gipatik ang mga balak ni Bay Renato Gutierrez. Kaniadto pa, nabasa nako ning mga balak niya sa Mindanews.com. Si Abay Renato man diay ang nagsulat. Maayo gyod ning balak sa kauban ang basahon, may dugang nga pagsinati ang matagamtam. 'Silingan namo ni', matod pa. Silingan sa Kalubihan.

Mihangyo siya sa 'Hikalimtan' ni Vicente Ranudo, mao nga gipangita sa kaban sa balayan ug karon gipabanlas na diha sa Baybayon Balak Bisaya.

Kon duna pay balak ipabanlas sa Baybayon Balak Bisaya, ipadala lang lunsayngbinisaya.baybayon@blogger.com

labyog-labyog,

Lubi

Silingan Kalubihan

2009-03-19T11:18:00.005+08:00

Ang Silingan Kalubihan maoy padad-anan og sulat kun tugon tali sa mga Silingan sa Kalubihan.

Mao pay pagsugod. Dugang ni siya nga pamaagi sa binayloay. Sayon pod ni nga pamaagi, kay ihatod gyod nganha kanimo ang sulat o tugon, ug makapadala pod dayon ka og balos.

Didto sa atong Kalubihan, may laktoranan nga 'SILINGAN KA', dapit agi sa kawil(tab) nga SILINGAN. Kapin pulo pa lang ang miapil niini. Kadtong interesado, dayon!

Lain pay ato, naay lab-as nga balak nga gibanlas sa Baybayon, Pagpanaw

Ang Way Unod Nga Pagbati

2009-03-17T23:16:00.002+08:00

Nindot mogaray ni si Candice Salazar, ganahan ko sa 'Ang Way Unod Nga Pagbati'

Upat na sa iyang balak ang gipatik sa Baybayon

Kon wala ko masayop, Inenglis ang naandan niya nga pagsulat, ug karon sa Kalubihan, matod niya nanlimbasog siya (o panlimbasog alang kaniya) sa pagsulat og Binisaya nga balak.

Pero morag dili katuhuan, morag tigsulat na gyod tingali ni siyag balak, kay makalingaw man ang iyang mga garay.

Way Imposible Sa Gugma

2009-03-13T13:44:00.002+08:00

Way Impossible Diha Sa Gugma

Way imposible diha sa gugma
Way bukid nga dili niya masaka
Way dagat nga dili niya matabok
Way disyerto nga dili niya malingkawasan
Kay way imposible diha sa gugma.

Nothing Is Impossible Where There Is Love

Nothing is impossible where there is love.
There is no mountain that love can not climb
No ocean that love can not cross
No desert that love can not survive
For nothing is impossible where there is love.

Paborito nako ni gikan pa sa akong pagsaulo niini sa bata pa ko. Unsay impluwensiya niini sa akong pagtuo, Dios ray nasayod. Pero, gani, bisan mag-billiard ko, akong pagtuo diha sa billiard table, "nothing is impossible' :-)

Na-program tingali ko ani nga poem. Hangtod karon, buhi pa ang programming. Mahinumdoman gihapon. Gahapon, kuyog sa akong higala uban sa iyang ubang higala, nag billiard mi human sa panihapon. Nalingaw ko. Duha ka tira nga 'creative' kaayo, maoy nakatagbaw nako atong dulaa. Pero nabantayan sa akong higala, wa siya masayop, nga ang lisod mapasulod nako, ang sayon hinoon, dili nako makuha. :-) Impossible is nothing, sa Nike pa.

Lubi

Ang Sinugdanan Sa Kalubihan

2009-03-12T12:09:00.004+08:00

Kini 'Ang Sinugdanan Sa Kalubihan' ang bag-ong gipatik sa Dahon Sa Lubi ug sa uban nga tanaman sa Kalubihan, nga nahisulat isip pagtubag sa pangutana ni Day Angel nga tigdumala sa Mugna Kalubihan,

Bay lubi,
giunsa man ni nimo pagsugod ang kalubihan?
nganong niturok man kini ug nanaha susama
sa saging kardaba? ug nasayod ko nga manaha
pa kini ug maayo... unsa man gyud ang imong
gipaliwatan niini? dakong kahibulungan...

Ang gisaysay, kaugalingon nga bantang o panahom sa tagsulat, kon dunay sayop, iya ra kini nga tulubagon.

Lubi

Way Pako Nga Gugma

2009-03-12T01:06:00.002+08:00

Ang 'Way Pako Nga Gugma' nahulma didto sa Mugna Kalubihan ug gipaambit pod didtosa Kalubihan sa New Jersey Kay nakauyon ang tigbasa didto, mao karon gitanom ug gipaambit kini sa tanaman Dahon Sa Lubi, sa Gumalaysay Bisaya ug sa Pinulongan Bisaya.

Dinhi sa Tugkaran sa Kalubihan hisgotan ang atong tanaman.
Padayon ta sa pagtanom.

Lubi

Sulayan angTamsi

2009-03-03T18:39:00.001+08:00

Sulayan, matag post, naay 'tamsi' :-)mag twit twit

DESIDERATA

2008-09-15T15:04:00.001+08:00

Orihinal sa iningles ni Max Ehrmann,
gihubad sa binisaya ni Jessrey G. Estella

Hamugaway ug sum-ok taliwala sa kasamok,
ug imong mabatyag unsang kalinaw anaa sa kahilom.

Sa walay puas kung mahimo, pagsablig ug kaayo
sa tanang binuhat.
Ipabuhagay ang kamatuuran sa paaging hilom ug tin-aw;
ug pamatia sila, sila nga hinikawan sa kaalam;
aduna puy katungod ilahang asoy.
Paglikay sa mga magahub ug mga mahagiton, maoy ilang dalit
ang lunlun nga kahasol.

Itanding ayaw si Ikaw ug si Siya, kay mahisangput lang
ka sa way sangputanan, kay di ikalalis nga kung
labaw ka man sa uban, sa uban pud ikaw hilabwan.
Paghudyaka sa imong kalampusan ingon man sa mga lampusunon.
Pabiling maikagon sa imong buhat, apan pabilin pung
magatunob sa yuta; mao ni kabtangang matuod
niining makanunayong buylo sa panahon.

Sa kanunay panagana sa imong pamatigayon,
kay ang kalibutan tugob sa tikas ug limbong.
Apan tuguti ayaw nga mosalimbong ni sa imong
paglantaw sa kaayo.
Ubay-ubayng mga binuhat ang nanglimbasog para sa
habog nga mithi; ug bisan asa ka lingi
puno sa kabayanihon ang kinabuhi.
Ayaw pagtakuban. Labing ayaw pagtumotumo sa pagbati.
Ni magtanom ug katahap sa gugma; kay bisan pa

sa iyang pagkamala ug pagkalimbongan,
daw balili s’ya nga way kapuol sa pagtuyhakaw.

Way kusmod nga dawata ang tambag sa milagbas nga
katuigan, ug hamugaway nga itugyan ang
imong kabatan-on.
Ugmara ang kaligdong, panagang batok sa
kalit nga tikyaub sa palad.
Apan ayaw busla ang kaugalingon sa mangiub nga paghanduraw.
Daghang kahadlok ang nahimugso sa kalapoy ug pag-inusara.

Ug sa makabaskog nga pagpitol, hinayhinaya lang
imong kaugalingon.
Sama sa mga layog nga kahoy ug nagpanidlak
nga bitoon, anak ka ning kalibutan;
binistihan ka sa katungod nga ihimugso.
Lubog pa man o tin-aw na kanimo, ang kalibutan
naghikyad na sa iyang angayng ipadayag.

Busa pakighigala na sa Ginoo, bisan unsa man imong
paghulagway Kaniya.
Ug bisan unsa man imong mga pagbudlay ug pangandoy,
sa kisaw nga kalibog sa kinabuhi, hatagi’g kalinaw
imong kalag.

Bisan pa man sa mga limbong, kabudlay ug
damgong nangagun-ob,
pagkaanindot gihapon sa kalibutan.
Mao nga pagmasadya.
Bugtawa ang kalipay

Nota Bene: This masterpiece was published by The Freeman dated August
31, 2008.

Mga Butang Kalab-oton

2007-02-28T13:49:00.000+08:00

Mga Butang Kalab-oton
[Hubad sa balak "Desiderata" ngadto Sinugboanon ni Omar Khalid]

Padayon sa panaw bisan pa sa kaalingisig ug katulin sa panahon.
ug hinumdomi unsa ang kalinaw diha sa kahilom.
Kutob sa mahimo away pagtalaw.
Magmabination ka sa tanang tawo.
Isulti ang imong mga kamatuoran sa tumang katataw ug kamainampingon,
ug manalinghog ka sa uban;
kay bisan ang mga sa kabos sa kaalam,
may kaugalingong mga kasugiran.
Likay sa mga huwabon ug mapahitas-ong tawo
kay sila makasamad sa kalag.
Kon itandi mo ang kaugalingon sa uban,
makawang ka lang ug masakitan,
kay sa tanang higayon may labaw ug may ubos kanimo.
Magmatagbawon ka sa imong kalamposan ingon man sa imong mga laraw.
Tutoki ang kaugalingong mga tinguha, hinunoa, magmaaghop;
usa kini ka tinuod nga bahandi sa mausabong dagan sa panahon.
Pagmatngon diha sa mga kalihokan;
kay ang kalibotan puno sa lingla.
Dili unta makapabuta kanimo kon unsa mang birtud nga imong nahuptan;
daghang tawo ang naninguha sa taas nga kahibalo;
ug sa bisan diin, ang kinabuhi puno sa pagpakabayani.
Magmatinud-anon sa kaugalingon.
Labaw sa tanan, ayaw pagsalig sa pagbati,
kun sa kamadali-dalion sa gugma.
Kay atubangan sa tanang mga kapuol ug kahaw-ang,
malawos kini sama sa sagbot.
Kalawata sa kamapaubsanon ang tambag sa katuigan,
ug hinay-hinayng isalikway ang mga butang sa kabatan-on.
Amumaha ang kalig-on sa espiritu kay kini ang malig-ong taming sa kapakyasan.
Apan ayaw linglaha ang imong kaugalingon sa dulom nga mga paghanduraw.
Daghang kalisang nga nahimugso sa atong kalapoy ug pag-inusara.
Luyo sa bug-os nga disiplina,
magmatinud-anon ka sa kaugalingon.
Anak ka sa kaliyongan,
Sama sa kakahoyan, sa kabituonan;
may katungod ka usab nga manikaysikay dinhi.
Tataw man kun dili kanimo,
walay duda nga ang kaliyongan naningkamot gayod pagpangga kanimo.
Busa pagmalinawon uban sa imong Diyos
bisan unsa pa may panabot mo Kaniya,
o unsay may imong mga siningtan ug pangandoy,
sa alingasa ug makalibog nga kinabuhi, pagmalinawon sa imong kalag.
Bisan pa sa tanang pagpakaaron-ingnon, pagkamalipaton,
ug basag nga mga damgo,
sa gihapon matahom kining kalibotan.
Pagbalon og pahiyom.
Ug paningkamot nga magmalipayon.

Ang Tigulang

2007-02-28T10:45:00.000+08:00

bilib ko ani bay

Kaabay

2007-02-19T13:56:00.000+08:00

Kaabay,

May nadungag nga kaabay, Ryan ang ngalan. Naa siyay kaugalingon nga payag o blog, bisrap.

Akoy

Strawberry, giputos og chocolate

2007-02-14T19:51:00.000+08:00

Marry, Happy Valentine's day, kining strawberry with chocolate gasa nako alang nimo.
Pangitaa lang dire, enjoy sa pagpangita. Google

Wala koy kadate!!!

2007-02-14T18:48:00.000+08:00

Day Marry,

Wala diay kay kadate pareha diay ta. Hangtod nga nakadawat kog tawag, katulo pa gyod gapanawag.
"Nasumada na ang imong electric bill, pwede nang magbayad karon". Computerized kun recorded pa gyod nga
tingog sa babaye. Pastilan, pwede pa untang unyaunyaon kay naa pa koy buhaton, apan kay ting paniudto na,
ako na poy nanawag sa karenderya sa ubos kay magpahatod na lang unta kog pagkaon kay wa ko magluto.
"Dili kahatod karon, kay nanguli ang mga trabahante, way makahatod." Nanguli na kay chinese new year na,
tulo na lang kaadlaw! Bililhon pa ni sa valentines' day, kay pangpamilya ni nga okasyon. Gadasok ang mga terminal
sa train og sa bus. Kon mga intsik nga magdungan og biyahe, na, ayaw na lang og biyahe. Luoy lang ang uban nga dili
gyod kapalit og ticket, dili kauli. Daghan kaayong intsik gabiyahe karon, ang uban gabus na lang.

Gutom na. Humag kaon. Milakaw na.

Hinoon paugnat sa kusog. Ania pa ang mga langgam sa Lunhawng Lanaw, taliwala sa dakbayan. Molabay lang unta ko,
kay gadali akong mga tiil,kulang na lang mobangga na sa gahinayhinayg lakaw nga mga bakasyonista. Apan, wa ko
masayop sa hukom. Mihunong ko kadyot, mipalit og pan aron ikasabod alang sa mga seagulls, gikan pa ra ba nig Siberia,
moanhi lang dinhi sa habagatang Tsina panahon sa tingtugnaw. Nakiglingaw ko nila. Nalingaw gyod hinoon ko.
Bilib kaayo ko sa ilang kahanas pagsalo kun pagdagit sa kinusikusi nga pan. Naay mokalit lang og piko sa pako dayon
simang aron matungnan pagdagit ang pan. Naay, daw mohunong og lupad diha sa wanang sa akong atubangan,
gapaabot sa gutling sa akong pagpitik tinipik nga pan. Kon nalingaw sila, mas nalingaw ko. Kon natambalan ilang kagutom,
akoa ambot unsay gibusog, basta nalipay lang ko, nahatagan og higayon kining gamayng lingaw taliwala sa pagdali.
Silay tag-iya sa wanang ibabaw sa lanaw. Kasayon lang paglupad.Ug kinanindotan nga talan-awon ang kalit og dungan nilag lupad,
daw nakadungog sa sangpit sa ilang pangulo, kay dungan gyod silang mobiya sa tubig ug mopaibabaw sa lanaw. Dayon
moputi sa kaanyag ang wanang sa ibabaw sa kakahoyan tungatunga sa lanaw. Pahiyom, ngisi,paningangha,madagayaon ang mga
panagway ang imong makita sa mga binuhat nga way pako, gahangad, gatan-aw sa kalanggamang gatuyoktuyok og lupad sa lanaw,
samtang siya sa iyang kamot gagunit pa sa tag 1 renminbi nga pan. Wa pa gyod ko natagbaw. Mipalit na pod og pan. Kalingaw ra
gyod! Nakalimot na sa pagdalidali. Ang tawo og langgam nagkasabot tungod sa pan.

Nabayran na. Wa na koy hunahunaon. Kay gi-unhan nakog bayad na ang pila kabulan aron dili ko magbalikbalik kadabulan.
Kay layo ra ba lakwon aron lang magbayad sa telephone bill. Mao na ni ang wa damha nga date. Nahinagboan nako ang akong amiga
nga intsik. Birthday niya, karon gyod dawng adlawa. Ang b-day party gabii, bisperas kuno to, gitambungan sa nagkadaiyang langyaw
nga higala, mga 20 ang nanambong. Lagi wa ko nabalitaan, kay dugaydugayng na kuno kong wala mibutho. Lingaw siya kaayo.
Karon hinoon wa siya kabalo unsay buhaton, kay unya pa alas-says ang iyang trabaho.Tingali mamalit og gift, kay ugma sad mouli na
sa probinsiya, sa Lijiang, usa sa langitnon nga dapit sa Tsina. Ganahan ko didto, nindot ang handoman nako didto. Ako unta paingon sa
paborito nako nga Cafe, gabitbit sa akong laptop. Apan ingon niya, daot daw ang wireless internet karon didto. Miadto na lang mi
sa French Cafe. Didto na lang gipadayon ang nasugdan nga valentayn's date nga gihikay sa kapalan nga pak-an. Niabot ang among
order nga cake nga gidayandayanan og pula nga strawberries, may pakapin pa nga pulang rosas, pula gyod kaayo nga way sama gawas
sa mga pasumbingay sa gugma. Miorder kog orange juice (og taodtaod,kape).Siya nagkape pakapinan og french fries. Ibabaw aning
mga pagkaon, daghang sugilanong naladlad. Mga tipaka sa kagahapon natipak. Ang liso sa kalipay mitumaw, mailagsik nakakitag
adlaw, nakasimhot og hangit ug sa yuta nga gahinamhinam nang mogakos kaniya. Daghang pahiyom sa palibot, kay daghang malipayon nga
binuhat karong adlawa, kasagaran naggunitay og kamot. Nag agbayanay. Nagkadaiyang hulagway...ubayubay ang gabitbit og bulak,
may lab-as ug buhi, ug may plastik. Dili mahulagway tanan dire, kay unsaon pagpinta sa dili matugkad nga kahinam sa kasingkasing sa
lalaki nga gahatod sa bulak alang sa iyang pinangga, o kaha sa babaye nga gagunit sa bulak, gamaya,galangi...dili madrawing ang pagbati
hinungdan lamang sa usa ka bulak, sa usa ka simbolo sa kadaghan nang gihanduraw?Dili ni masulat. Kay ang makabalo ani, kadto lang
naghatag og kahulogan sa Valentines day.

Laktoron na lang ang estorya, tawhay sa gawas mi sa lawak sa Cafe, kay puno na ang ubos ug taas. Apan sa gawas, nindot. May adlaw.
May dalan. May gagabasgabas og labay ang mga tawong giputos sa nagkadaiyang bulok ug hulagway. Samtang kami nagsalosalo sa cake
og sa french fries, nag-inambitay sa mga sugilanon sa kadasig sa kinabuhi nga tukmod sa hagit kalipay nga nangimbabaw. Mga pasumbingay
nga pinupo gikan sa mga sanga sa kasinatian, nga kon iasoy na gani, dili ba lalim ang pagtuhop sa alimpatakan kun panumdoman sa kalag.
Samtang ang kape gidimdim bisang wa butangig asukar, lami gihapon tungod sa katam-is sa cake. "Gusto ba ka motilaw sa akong cake?"

Espesyal nga cake ang among gisalohan kay daw kasingkasing ang hulagway, lamian ang gipurongpurong nga strawberries,
miagni nako pagkanta og 'happy bday' nga kinasingkasing alang kaniya. Kon makahigayon, tingali makagawas ko unya, apan dili ko kapanaad.
'Kay naa koy panaw usab nga pangandaman', mao say gihunghong sa akong kahiladman.

Simple lang nga valentine's date...pero nasimhotan pati mga tinabonan sa panahon, naukay ang mga kagahapon, ang liso sa
nga naglaom, nakaangkon sa katumanan, dungan sa pagsiak sa mga takna, pagkapulpog ngadto sa mga gutling sa kalingaw
nga gisaw-an. Tungod sa tinud-anay nga binayloay, mibukad ang pultahan sa pagbati, miabli sa mga panid sa tinipigan,
samtang gapadayon og saulog ang nagkadaiyang bulok sa katawhan tungod sa nagkadaiyang hinungdan ning adlaw 14
sa Pebrero, adlaw sa kasingkasing, alang sa kasagaran. Adlawng natawhan alang sa akong higala. Adlaw nga
bulahan alang pod nako, kay ang akong higala maoy akong kadate sa espesyal niya nga adlaw. Malipayon nga adlaw.
Kasaulogan sa kinabuhi, nga wala nahikawan, wala malimod.

Gikusi ang akong kasingkasing, sa dihang miagi kog lanaw ug wala na didto ang libolibong langgam. Bisan usa? Wala
na gyoy nagtikawtikaw. Luyo sa akong dughan, nagkanayon, maayo na lang kay sa kataposang higayon midesisyon ko
nga mohunong, mopakaon, makighagwahagwa sa mga seagulls.

Akoy
2007.02.14
-----------

Hay kalame ra huna-hunaon kung naa kay kadate karong adlawaha
Valentine's gud!!sos kung wala gani kay kadate maypag magpaligis
nalang 'ta ani.
Oh yes jud isa ko sa walay kadate karon mao gani nga nagtrabahotrabaho
nalang ko diri, kay ang naay kadate diri sa among office pwede
moabsent syempre halos tanan samo diri wala poy mga kadate mao nga
kami nalang ang nagdate-date.

Hehehe...

Laina jud aning wala tay kadate oy mura gni tag gitabonan sa langit ug
sa yuta!ok lang untag walay koy kadate basta naay koy bulak ug
chocolate?pero sos pastilan mwaski dahon tawn sa rose o sa bulak wa
jud tawn oyy... hay ako najud!

Marry Joy

----------

Kanus-a nagsugod ang Bisrock?

2007-02-13T21:44:00.000+08:00

nagsugod paglanog ang Bisrock niadto pang mga tuig 1994 . apan dili pa Bisrock maoy termino o ngalan niini. ubos pa kini sa gitawag og Bugs Underground Sound Movement nga gipangunahan ni DJ Ka Pedro sa 99.5 RT FM Station. maoy pagsugod og sikat sa banda nga Scrambled Eggs niadtong panahona nga maoy nagkanta sa "Humba" apan dili pa si JR Siaboc ang bokalista (nga nasulod sa Pinoy Dream Academy).

apan wala makabuylo sa kahanginan ang maong Binisayang mga kanta kay lagi, daghan mang lud-on maminaw kay Bisaya man lagi. ang grupong Missing Felimon nga maoy labing sikat karon sa mga Bisrock band, nakasinati usab sa maong kalisdanan kaniadto hangtod nga ilang naabot karon ang pungkay sa kalamposan. dili nila makalimtan nga sa higayong motukar na silag mga Binisaya, biyaan sila sa mga tawo ug maingon nga ang "tag-iya nalang sa trumpa ug Petromax" maoy nagpabilin.

nahunong ang Bugs Underground kay nasuko o nasilo ba kaha si Ka Pedro dihang dunay gipahigayong concert didto atubangan sa Gaisano Country Mall diin imbis moduyog sa musika ang tumatan-aw, kalit man hinuong naukay kay kalit dunay miulbo nga kagubot tali sa duha ka pundok sa mga batan-on nga gidudahang sakop sa managribal nga fraternity sa Akrho ug Tau Gamma. misulti si Ka Pedro sa microphone ug misuway pagbadlong sa nahitabong kasamok aron mapadayon ang nasugdang kalingawan diin maoy main performer ang banda gikan sa Manila nga Rivermaya (maoy pagpuli ni Rico Blanco isip bokalista ug dili na si Bamboo Manalac).

apan imbis mopatuo ang nag-"ramble" nga mga batan-on, gibugal-bugalan ug gisinggitan hinuon si Ka Pedro og: " Bayot ! Bayot ! Bayot ! ! ! "

sukad niadto, gihunong ni Ka Pedro ang pag-"airplay" sa mga kantang Bisayang rock.

tingali gumikan gyod sa kasuko.

unsay naa karon sa mga liriko sa Bisrock?
sagol-sagol lang ang linya sa mga liriko sa Bisrock. apan kasagaran daghang kritiko ang nakasaway sa mga linya sa kanta. usa na niini si bay Tomas. naglabi man gud sa mga kanta pulos mga bastos. gisayon-sayon lang dinhi paglitok ang lagay, oten, bilat sa mga igat, patila sa bisong ug daghan pa... kasagaran pod dili sakto ang espeling sa mga pulong ug daghan ang nag-ingon nga wa gyoy poetic license . duna usay sayop nga paggamit sa mga pulong sama pananglit sa "na" imbis unta "nga".

ang grupong Missing Felimon mao ra gyod ang banda sa Bisrock karon nga dunay maingon nato nga timgas nga mga liriko ug dunay poetic license. gipakita dinhi ni Insoy sa iyang mga kanta ang kamaayong laki niya mosuwat og gumalaysay kun essay sa Iningles. mao ni ang nahimo nilang sakayan nga gihangop sa kadaghanan ang tanan nilang mga kanta. gitandi sila karon nga susama sa malamposong banda sa Manila nga mao ang Eraserheads nga gipangulohan kaniadto ni Ely Buendia (bokalista / gitarista ) ug anaa na karon sa banda nga Pupil. naningkamot usab nga makahimog mga kanta nga dunay "unod" ang banda nga Radstuff diin dunay mga komposisyon si bay Tomas apan wala pa lang maila.

kinsay pinakabastos nga banda sa Bisrock?

ang banda nga Econo 140 maoy matawag natong kinabastosan sa tanang grupo. dinhi hubo nilang gigamit ang mga pulong nga giingon natong hilas: oten, bilat, ulok nagnana kay nasira ug daghan pa... mao niy naingnan nga bisan usa, wa gyoy gidawat si Dj Ram sa ilang mga kanta aron unta ipabati sa kahanginan. pabilin silang aktibo apan "underground".

dihang nahinabi ko sila bahin sa ilang mga kanta, sila miingon nga dili ang pagbinastos maoy ilang tuyo ngadto sa mga Bisrock fans, kondili, buot nilang ipasupot ang mensahe nganong ang mga kantang Iningles nga duna usay mga hilas nga lyrics sama sa "fuck you, fuckin shit, asshole etc..." yano ra man kaayong gipatugtog sa atong mga FM Stations?

inyong higala,

nemsi

Mingaw pas Tirana

2007-02-12T13:53:00.001+08:00

Bay Jesse ug Bay Mario,

Mahimong gamiton ang lunsayngbinisaya
sa pagtanom ngadto.
Ihatod sa tanaman sa Sugilanon Bisaya
http://sugilanonbisaya.blogspot.com

Karon nahatod na pod nako ang tubag nako
nimo Bay Mario, bahin sa paghubad og langyaw nga
pulong. Gitanom didto sa tanaman sa Pinulongan Bisaya.
http://pinulonganbisaya.blogspot.com

akoy
-------------

Bay Mario,

Salamat sa imong tubag, ako pod ning dad-on didto sa tumumanon nga bisrock kabataan.

Kadtong imong mga nobela bay, Ipasulod ta to sa atong bag-ong gigama nga blog sa google. Ipadala lang ni bay akoy ang imong file.

Jesse

-------

jesse,
nabasahan ni Mario L. Cuezon sa usa sa mga nobela ni
Jorge Amado nga ang tirana usa ka awit nga mingaw
bahin sa mga tiraniya (tyrannies) sa gugma.
(oppressions of love)
portuguese ang kultura sa brazil pero ang pulong
tirana mao man sad ang atong gigamit.
busa kung mingaw pas' tirana, labaw pa na kamingaw sa
mga awit sa mga panaugdaug o kasakit sa gugma.

nakatabang ba ni nimong impormasyona?

bay mario

Re: [bisaya] Re:Mingaw pas Tirana

2007-02-12T13:46:00.000+08:00

Bay Jesse,

wa koy nasayran nga hubad ani bay.

Unang proseso sa pagdawat og langyaw nga pulong, mao gyod ang pagkopya.
Pananglitan: computer.
Ikaduha: angayon siya, binisay-on pag ispiling, 'kompyuter'
Ikatulo: gipahaom sa sistema sa pinulongan, subay gyod
sa iyang pagsabot sa butang, subay pod sa tingog sa iyang pinulongan, sama ani,
dagitabyan.
Ikaupat: katawhan nay magbuot kon ila gyod nga dawaton, kon ganahan ba sila o dili,
kon gamiton ba nila o dili.

ang binisaya ra sa toothpaste akong nasayran....
kolgit (joke lang).Bitaw bay, paaboton nato nga mahingpit na gyod og sabot ang butang langyaw
ug nga mahubad sa hingpit. Kay kanang kolgit, naa na sa ikaduhang ang-ang nga pagkopy o pagpahaom,apan
dili siya husto gyod nga pagkasabot sa butang. Kay brand lang ang colgate, dili mismo ang butang. Mao karon
libog kon ingon nga : "ang paborito nakong kolgit kay klos-ap" :)
Nagkamoritsing no? Makauhaw. Inom na lang sa tag cokes nga orins.

Lain pay ato. Nausob ang hulma sa tugkaran. Tungod sa laktod nga paghatod og binhi. Maapektohan diay. Tungod
tingali kay gikan pod sa yahoogroups nga binayloay-tubagtubag ang gihatod sa tugkaran. Nakaapekto ang mga
nagpahiping dili ingon nato nga gitawag og html.

Bitaw, ako nang gisilhigan. Gitanom og otro sa way laktodlaktod.

:)
Akoy
----------

Bay Akoy,

Unsay may binisaya sa toothbrush, cake og rollercoaster

pangutana gihapon ni pinay apil ni sa among panagsultisulithan sa ilang tulumanon karong lunes.

Jesse
---------

Kalubihan

2007-02-12T13:15:00.000+08:00

Bay Jesse,

Gihawanan nako ang kalibonan, karon lang gyod, gihimoan nakog agianan gikan sa atong balayan, sa tugkaran paingon sa Kalubihan (Ka-LUnsayngBInisaya-Han). Lapad-lapad biya gyod diay ang yutang kabilin sa atong kaliwat. :)Dugang luna sad ni sa atong kaubanan, mga kaLUBIhan.

Duawa ron, basig maabtan pa nimo tong bag-ong gisangko nga tuba. May bangus nga sinugba. May haling pa didto. Ug kinilaw nga bolinaw. Hehehe, didto gihipos sa http://360.yahoo.com

Butangan lang nakog pipila ka hulagway. Pangsugod lang, ang mga kaLUBIhan nato napoy mag-igo, kon mag-unsa sila dinhi taliwala sa mga habog nga lubi. Basig ikaw ang unang makaduaw sa lapad natong kalubihan :)hehehe

Pili lang ka. Butong og tuba? :) Bantay-bantayi pod diay, basig naay mangawat og lubi. Hehehehe

Kining kalubihan nato nindot ni nga luna sa mga kaLUBIhan nga taga balayan, labi natong gagamit og yahoo nga email. Kay matag,yahoo nga email, duna'y iya nga 360 (kalubihan). Kasagaran walay nagpanumbaling ani, gapaabot lang siguro nga mahulog ang butong. Lisod man god sak-on. Paaboton na lang unsay mahulog, kasagaran lahing. Diay makalingaw sad kon pahimuslan. Ang lubi mismo pwede pang kaguron, pang ginataan. Saktan og bulad. wow! ssssssssshhhhhh. Hay,may bolinaw ug kamonggay. Makalingaw gyod. Kon mangahas og saka, maka-tuba pa. Iya sa lunsayngbinisaya ang kalubihan(360.yahoo.com). Mag-abot ra ta didto. Ang mga tig-hawan, tig-panangko, tigkatkat og hilig og butong, mag-abot ra gyod didto.

Ug unya pohon, hinaot mahawanan ang dalan libonan nga dalan aron kaagian sa mga kaubanan nato nga gagamit og yahoo nga email. Aron sad, makatultol ta sa lainlaing payag nga pahulayan sa mga kaubanan sa lapad nga kalubihan. Magkalingaw tag bisitahay pohon. Labi nag gikan na ta sa tanaman, nindot magpahayahay sa payag sa atong kaLUBIhan.

Dire sa ko, kay himoon nato tong sugyot nimo, paingon sa Lingtonganay...

Kon makahigayon ka, bisitahe nimo ang dagitwanang bisaya
Nalingaw kog paghawan ani nga luna alang sa tanaman sa Dagitwanang Bisaya. Nahimugso pod ang bag-ong mga pulong: dagitabalayan(website), dagitabi(chat),dagitwanang(cyberspace/internet),dagitsulat[dsulat] (email)....

Ilisan lang nato ni pohon, kon may labing nindot nga ingalan,

Akoy

-----------

jesselito Baring misulat:

Bay Akoy,

Maayong nga imo nga gisulti nako da. Kanang gisulti ni Bay Nemis Pwede pod na nato dad-on sa Lugar nga pagatawgon og "LINTONGANAY". kay saysay man kon giunsa pagmgna kanang paghitabo karon sa bisrock. Kadto pod diayng mga sulat ni Bay Tomas Dinhi kabahin sa balak og pagsulat og sugilanon, maayong untag makig to nato unya atong matanum didto sa atong tugkaran.

Jesse

Pahibalo sa mga Tig

2007-02-10T15:08:00.000+08:00

Mga Abay,

Sa 'Ang Tamdanan', may hilit nga agianan paingon sa tanaman nga 'Tamdanan sa Tigdumala
http://tamdanansatigdumala.blogspot.com

Mga tig (tighugas og plato, tiglaba, tiglung-ag,tigsilhig,tigpanghikay,tigdumala sa buhatan) lang ang makabasa ani. Kay dinhi pagahimoon ang mga sensitibo nga impormasyon ug desisyon niining buhatan kun tanaman.
Sama sa paghisgot og passwords ug mga paingan/address(laktoranan paingon sa tanaman, laktod nga pamaagi pagpadala og binhi nga itanom sa usa ka tanaman) nga dili angay masayran sa spammer ug advertiser.

Akoy

Ang Tamdanan

2007-02-09T21:05:00.000+08:00

Ok Bay Jesse,

Mugnaon nato: "Ang Tamdanan"

Og kining masanggi nato nga mga teknikal nga kahibalo, atong ipatik niini. Kon kinsay
buot mobaid sa ilang kahibalo sa kahimanan(technology)....subayon lang niay ni.
Ug kanang mga hisgot hisgot nga teknikal, nga dali makabuyong...didto na lang nato
hisgotan ug ipatik....aron sa sigeng balik-balik og hisgot-patin-aw, masabtan ra gyod
di madugay.

salamat sa ngalan 'Ang Tamdanan'

nindot,

Akoy
------------

Bay Akoy,

Ang tukma nga pangalan sa atong Reference site mao tingali "Ang Tamdanan" kay adto nimo buhaton ang mga giya nato. Bag-o pa pud ko sa ADsense bay pero naa na koy nahibal-an nga naay gyoy kwartang mosulod ana. Nan Ato na ning bantayan bay atong tanaman. Sige lang kon unsay akong makoykoyon, ako lang pong ipahibalo nimo.

Jesse

Tubag: Tuyok Sa Tubig

2007-02-09T20:50:00.000+08:00

Bay Jessie,

Sige bay. Akong sulayan. Basig makatuon ta sa proseso sa pag-edit. Lahi pod ni
nga kahanas nga tun-an. Silang Bay Edgar ug Bay Godin ang hanas na ani.Si Bay Mario
sad, mao pod ang talento.

Ako lang ipadala kanimo kon unsay akong mahikay pag-usab(feedback) sa imong sinulat.

Akoy
------------
Bay Akoy,

Akong gibasa og balik ang akong natanum didto, mas maayo tingali nga ato sa tong tabangan og guna para mahinlo. Kay naa pa siyay mga pulong nga mahimo pa natong matambokon. Gihatagan tika bay og katungod nga moausab sa iyang pulong para motambok siya. Unya nako itisok sa laing uma kon kini tambok na,

Jesse

Nateknikal: Naatikan sa Tuko

2007-02-09T20:43:00.000+08:00

Bay Jesse,

Nahulog sa Lubi. Naatikan sa Tuko!

Tudloi sad mi bahin aning adsense. Di pa ko kabalo ani. Teknikal man god.
Lagi, bag-o lang gyod ko misulat nimo.Nangayog sugyot, kay kon mogama tag mantalaan kun
basahon kun patikanan bahin sa mga teknikal nga sinulat. Unsay maayong ingalan nato?

Himoon nato. Daghang teknikal nga mga kahimanan nga nindot hisgotan. Labi na bahin sa pasikotsikot sa 'blogger', aron sa hinayhinay mapalunhaw pa gyod nato ang atong tanaman. Ug aron makoralan sad nato ang atong tugkaran.....aron makahimo sad tag gagmayng payag-payag nga kapahulayan sa kaudtohon, o kaha, kaestambayahan sa kahapunon.

Padayon og labyog. Ang imong nasayran bahin sa adsense, maoy una natong imantala sa basahon pangteknikal, para sa mga
'gik' (geek) nga bisdak. Mora mag hulagway sa tuko sa akong pandungog. O, kaha, dili lang gyod malimtan ang nangahas ug nahulog pagsaka sa Lubi. Hehehehe, kinahanglan biya sad tag pang-gik nga kahanas, aron atong magwardiyahan ang mga butong ug tuba sa atong tanaman. Kay basig pupoon sa gapangharan kunohay. :)

Naa koy ginasulbad karon...kon unsaon pagpahatod sa mga ani,kon masanggi gikan sa tanaman paingon ngadto sa atong balayan.
Morag maghimo tingali tag, kawayan saluranan sa ulan, aron mosalod ug mohatod sa tubig paingon sa atong kusina ug banyo. Bag-o lang ko nagsulat/nagpahatod og mensahe(Ang Tubod gipurongpurongan og Dahon sa Lubi) sa duha ka paagi. Una, gilahos nako sa bisaya@yahoogroups.com. Ikaduha, giagi nakog usa ka 'blog', Bisang Unsa Lang(http://bisangunsalang.blogspot.com.
Kon kaduha nimo nadawat diha sa balayan, nan, nagmalamposon. Ang 'Bisan Unsa Lang' nga luna gihimo aron hiposanan, tapokanan sa tanang binhi nga gitanom sa tanaman. Aron may usa ka dapit nga dugokan. Kadtong dili ganahan maglaaglaag sa paskikot-sikot sa tanaman, didto na lang siya sa payag tambayanan, asoyan sa Bisang Unsa Lang.

sige, ako sang susihon kon milampos ba to. Kon imong masulbad, ipaambit lang pod, didto sa atong teknikal nga basahon. Pagsugyot unsay ingalan sa basahon. Unsa kahay nindot?

:)Akoy

Ang Tubod gipurongpurongan og Dahon sa Lubi

2007-02-09T20:13:00.000+08:00

Bay Jesse,

Minindot ang pahina/dahon sa Tubig diha sa Kinaiyahan sa Atong Tanaman, tungod sa mitulo nga dugo/singot sa imong dagang. :) Nindot pa gyod diay kon lunsayng binisaya ang gamiton. Atong imantala ning imong gisulat sa atong basahon/reference/encylopedia :). Mahimong tawgon nga: Atong Tubod.

Kay tuboran og inspirasyon aron molunhaw ang atong panghunahuna. Tuboran pod siya
og kaalam. Kini katimbaan kun kakuhaan ug inspirasyon ug kaalam. Usa ka 'reference' usa ka 'source', 'tubod sa
mga inspirasyon ug impormasyon. Atong Tubod. Ok ba?

Tingali, sugyot lang pod gihapon ni, kay lagi bisan unsa lay mahunahunaan ug bisan unsa ra poy mahimo nato ron agi
aning teknolohiya sa gambalayan (internet), nagkadaiya lang magama nato nga gambalaya, sama aning 'blog'. Pahimuslan nato.
Atong sulayan. Ug subay pod sa sugyot ni Bay Totoy nga magmugna ta'g yanong basahon nga
magpadayag sa atong kaugalingong kasinatian ug nga makapahaling sa mga tungol sa mga tawo (kasingkasing man
tingali to :)ug makapahigmata kanila sa dakong sunog taliwala sa ilang kahimtang. (edited na ni, tingali dakong baha ang
kahimtang karon...hehehe). Kining ingon ani nga mga kasinatian sa pang-adlaw adlaw, mga sugilanon sa kagahapon, mga sinukliay og impormasyon kun tambag bahin sa kakulian sa panginabuhi ug sa mga gibuhi kun nakabuhi nga gugmang giatay,
mga gitikgitik, ug uban pa...nga suod sa kasinatian sa kadaghanan, sa laktod, 'tsismis'...basta lunsayng binisaya lang gyod pagkasulat, tingali mahimong imantala nato ni sa atong yanong basahon, sugyot lang, tawgon nato nga Dahon sa Lubi.
(Dagang ug Dahon sa Lunsayng Binisaya). Ug kon, dunay laing sugyot nga pangalan mas maayo. Puslan, man
maghimo diay tag daghang basahon. Sama sa, mga teknikal kun mga kahibalo bahin sa 'blogging', mga tips, mga kahimanan, nga
angay puslan aron sa pagdayandayan sa atong tanaman. Total, libre man magmantala dinhi sa atong Tugkaran. :) Ang ato ani nga malingaw ta. Ug makapaambit sa atong kalingaw sa uban, labi na sa sumusunod nga henerasyon. Taman nato ang tanaman og
inato nga mga kaalam ug kasinatian nga gipatik diha sa mga Dahon, pinuslan ning Dagang sa Lunsayng Binisaya.

Kining imong gisulat, kay dili man ni inadlaw adlaw nga madungog, ug kay sayantipiko pod ang bagtang (point of view) ani, nan isip reference ug tuburan sa kaalam, didto nato imantala sa: Atong Tubod. Aron pohon, matagkaron ug unay, naa ta timbaon.

Unsay sugyot nimo nga ingalan sa atong basahon/journal nga pang teknikal/imbensyon/sayensiya?
Kun naay mahunahunaan, ato dayon himoan og luna sa atong tanaman.

Akoy

Gapangita og Gugma sa Bisrock

2007-02-09T11:04:00.000+08:00

Day Lora,

Dayon sa atong balayan.
Bahin sa imong tuyo...

Duawa si Pinay Mangatkatay, kay ampay niya ang bisrock ug higala niya
ang mga batan-on nga bisrockers. Kauban pod niya ang pipila nga gabudlay
sa pagtino sa kasaysayan sa bisrock. Dili madugay masayran ni nimo. Ug
hinaot
itanom sad nimo ang binhi nga imong mapupo sa imong pagpanukidoki didto
sa atong
tanaman, sa luna sa Bisrock. Duawa lang:

http://bisayarock.blogspot.com
Ihatod lang tika didto aron makatultol ka sa agianan.

Buot sad ko nga magpahayahay didto, maminaw sa mga laylay sa atong panahon.
Kon moadto ug sa Atong Tugkaran ka manukad
Mahimong gikan sa: (http://lunsayngbinisaya.blogspot.com) Atong
Tugkaran>Tanaman>Katawhan Bisaya>
Buhilaman Bisaya>Layalay>Bisrock.

Hinaot didto ka masaag. :) Hinayhinay didto, kay daghan bugoy nga buotan. :)
Ug hinaot magkita mong Day Pinay, ug inyong matin-aw gyod ang sinugdanan
sa Bisrock. Ug hinaot itanom lang dayon
ninyo ang mga binhi sa inyong pagpanukidoki didto, aron pohon molabong
ug mabulahan ang mga bisdak sa atong balayan, Lunsayng Binisaya sa ilang
pagduaw didto. Malingaw dayon sila sa mga inato nga laylaya.

Dayon sa atong balayan, sa atong tugkaran, sa atong tanaman,

Akoy

----------
jaguarians2002 misulat:

Ako si Lora Suico, usa ka tinun-an sa USC...Akong Kurso kay Sociology.
Magpatabang unta ko ninyo sa akong gi tu-on karon na Bisrock na
musika. Asa na nagagikan ang pulong na Bisrock ug unsa ang pasabot
niini. Nganong nadawat ang maong musika sa katilingban ug nganong
ilado naman sa kadaghanan. unsa may naa sa titik sa musika...Salamat
ug manghina-ut ko na naay mo unong sa akong problema...

Atong Tubod tupad sa Atong Silingan

2007-02-08T21:05:00.000+08:00

Bay Jesse,

Sulay kog hatod sa akong tubag ngadto nimo sa Atong
Balayan(bisaya@yahoogroups.com) samtang
sulayan og hapit pod sa tugkaran. Kon dili masayop, mabasa pod ning
sulat nako ngadto sa Tugkaran.
(giusban nakog padala kay nasangit sa silingan, wa miabot sa Tugkaran).

Atong Tubod
Kini maoy ingalan nato sa imong buot kaplagan bay Jesse mga maoy
maseguro sa pagpalunhaw sa atong tanaman. Subayon nato ang dagan
sa imong hunahuna kinaimportantehan. Kon wala bitaw ang tubod, dili
mohimpos ang tanaman. Masayang lang ang atong pagbudlaw. Mausik ang
panahon. Malayos ang tanom Ug dili kitag adlaw ang paglaom sa mga binhi.

Unsa gyod kaha ang tubod nga atong
makaplagan. Nindot ang dagan sa hunahuna sa imbentor ug golfer.Mangita
gyod og tubod, buho sa lunhawng kalipay.

Atong Silingan :)
Kini pod himoan natog agianan kun ganghaan paingon sa atong
mga silingan...aron dali ta makapamisita ug makaduaw...pohon kon
mailaila na nato.

Ug kon molabyog na si bay Tomas, maoy mangulo natog pangharana,
kinsa kahay pakatkaton sa lubi. Tuba na lang atong tuyoon. Palit na lang
ta dayon.

Kuskos na dayon, maglingaw ta sa atong tugkaran.

:) Akoy

Niabot na ko

2007-02-08T20:03:00.000+08:00

Sa kadugay nakong tuyok-tuyok nahiabot ra gipapon ko ning atong tugkaran, Pastilang lamia sa akong paminaw nga niabot ko dinhi. Atong dakong pasalamat ni Bay Akoy nga maoy naghago sa pagkaplag ning atong nahimutangan. Akong namatikdan nga sa dili pa ta moabot diri sa atong tanaman, morag daghan man pod diayng silingan nato dihing dapita. Nagkadaiya man tong mga bisaya nga akong naagian sa wala pa ko makasulod dinhi. Siguro kon matigayon na ta diri, mamisita pod ta nila didto basig duna tay masarap nga balita kabahin sa ila pong mga gipananum. Basin pod og makaapil ta og sanggi unya dayon makakaon ta og inanag.

Maayo pod unta kon ang ubang tagbalay molusad dinhi og mohatag na og tampo para mapuno na ning atong tanaman sa nagkadaiyang kinabuhi. Siguro akong buhaton mao ang pagpangita sa tinubdan sa tubig ning dapita kay dili mahimutang og dili molipang ang atong mga tanum kon walay ikabisbis niini.

Kahibalo ko nga ang kamingaw mahulipan sa kamaya kon magsingabot na ang atong tanang kaubanan. Dunay molaylay, dunay sayaw og dunay mobalak. Dunay magtuwa sa bag-o pa kaayong kuha ni Bay Tomas. Pero ang tagay di gyud nato gikalimtan kay kini maoy mopasamot sa atong kalipay og hudyaka.

Jesse

Tanaman sa Tugkaran

2007-02-04T14:46:00.000+08:00

Mga Abay ug mga Inday,

Manaog ta sa tugkaran: http://lunsayngbinisaya.blogspot.com
Ug kalingawan nato ang pagtanom.

Dili siaw magtanom sa tugkaran sa balayan kon way tuba ug way sumsoman.
Kon way way mogitik sa gitara, kinsay mangahas mokanta?Kon walay moasoy og sugilanon
mag-unsa na lang ang gatalay sa hagdanan, maghingut-anay sa hilom? Kon way mobalak,kinsay
mobisbis og tubig sa ugang yuta ug sa bulak ug tanom?Unsaon na lang paghigop og sabaw kon
way tinanom nga kamatis og kamonggay. Kalami sa law-oy, kon lab-as. Kanindot sa atong balayan, may tanaman sa tugkaran.

Ang Tanaman sa tugkaran sa Lunsayng binisaya, luna sa pag-ugmad sa atong pinulongan ug buhilaman, sa tanang inato ug nahilambigit sa kalamboan sa atong buhilaman. Gapaabot ang
Yutang Tabunon sa tulo sa atong singot ug laway. :)

Hinaot ang atong tinanom mokaylap manalingsing, modaghan, molabong ug dakong ani
ang atong kalipay bunga sa paningkamot.

Kitang tanan, ikaw ug ako, maoy mag-igo kon unsay atong itanom dinhi
kon unsay pabungahon ug kon unsay anihon alang karon ug sunod henerasyon.

kuskos na sa kitara,

Akoy